Williamnagar, June 15,2025: Garo Hills Youth Solidarity (GHYS), East Garo Hills Williamnagar, Kusimkolgre ramao Garo Hills Autonomous District Council (GHADC)-ni rikenggipa Shoping Complex-ko matchotgija galchipe donengani gimin, GHADC-ko matnangataha.

Ia project-ni kamrangko ru·uta bilsirangna kam matchotgija donaniara jolni manderangko ka·donggramatani ong·aha ine GHYS-ni President Endick M Marak parakataha.

East Garo Hills-ni skotong songjinma Williamnagar-ona napchengon ia matchotgija galchipe donenggipa building-ara Williamnagar town-ni mikkim rasongko komiata, buildingko rama bibrao rikgija town-ni chel·kala biapo riksrangoba, indake namgijagipa kamko darangba altue nikna man·jawachim ineba Endick Marak janapataha.

GHADC, game cha·enggipa manerangna pale sim·e cha·na namgipa cholko on·na miksonganiko donchipaniara, jolni manderangko indin ka·dongramatani ong·a. Ia chu·sokgijagipa kamko GHADC-an daito ra·na nanga ineba Marak parakataha.

GHADC-ni galchipe donenggipa kamara, manderangni gamko ba tangka paisako simsakgija jakalniko mesokani ong·a. Ia project-ko GHADC-ni chu·sokatna man·gijani a·sel tangka paisa noksan ong·aniko ra·baa aro jolni manderangna namgipa cholko on·na sikgijani gita ong·a, ine janapatenba, galchipe donenggipa project-ko ta·rake matchotatchina GHADC-ko dabiaha.