@ghdnews.in@

Tura, Jan 20, 2026: Re·anggipa January 9 tariko, West Garo Hills a·jani Rajabala Pulis Station-ni ning·o donggipa Goalgaon songo, ACHIK Organisation-ni member Dilseng M Sangma-ko so·otani bidingo am·sandina gita, West Garo Hills a·jani Pulisrang, Special Investigation Team (SIT)-ko songaha, ine u·iataha.

Iani bidingo u·iatengon, Goalgaon songo ACHIK Organisation-ni member saksako so·otanio jak donggipa manderangko am·sandina, Dadenggre-ni Sub-Divisional Pulis Officer (SDPO) R.A Sangma-ni dilanichi SIT-ko songaha aro ua a·selo jak donggipa manderangni bidingo saoba kobor-rangko man·genchimode, ia 7005680094 phone nombor-ona call ka·e u·iatna man·gen ine West Garo Hills a·jani Superintendent of Pulis (SP) Abraham T Sangma parakataha.

“Da·o dipet ua a·sel ong·anio jak donggipa sak 8 manderangko pulisrang rim·aha aro ua a·selo jak donggipa gipin manderangkoba rim·na pulisrang raken kamko ka·enga. Uamangko a·songni on·gimin niamo pangchake pulisrang, ua a·selo jak donggipa pilak manderangkon rim·na jotton ka·enga” ine West Garo Hills a·jani SP, Garo Hills-ni manderangna ku·rachakataha.

Uni gimin skatang tol·e jangbingbangnirangko bebe ra·jachina aro tom·tomaniko rakkiangkuchina SP, Garo Hills-ni manderangko didiataha.

Pulisrangni u·iatani gitade, ia a·selo jak donggipa sak 8 manderangko rim·aha aro ua manderangara, bilsi 30 ong·gipa Anarul Islam, bilsi 47 ong·gipa Rafiqul Islam, bilsi 40 ong·gipa Atowar Hussain, bilsi 30 ong·gipa Ariful Islam, bilsi 21 ong·gipa Ashadur Sheikh, bilsi 22 ong·gipa Mozidur Hussain, bilsi 33 ong·gipa Mofidur Hussain aro bilsi 22 ong·gipa Mozahidur Rahman ong·a.