@ghdnews.in@

Tura, Jan 23, 2026: Rajabala Pulis Station-ni ning·o donggipa Goalgaon songo a·sel ong·ani ja·man, jatgnini gisepo adita ding·chaogrikanirang ong·katahani gimin, mikkangchi iandakgipa a·selrang ong·gnirangko champengsona gita, West Garo Hills a·jani Deputy Commission Vhibor Aggarwal, BNSS Section 163-ni ning·o una on·gimin bilko jakkale, a·kawe jolni adita biaprango dakna man·gijagipa niamrangko ra·gate champenganirangko dakataha.

Official-ni parakatani gitade da·al January 23 tarik attam 6 bajioni pring 6 bajiona salantian, gital niamko ra·gattaikuja dipetna Hallidayganj, Rajabala, Phulbari aro Tura pulis station-ni ning·o donggipa biaprangko man·chape, manderang sakbongana bate tom·dakjachina aro re·ruraaniko dakjachina, manderangko saknaatna man·gipa gol·dik, ro·ong, matsramgipa atte-rang rod-rang siltongrang aro gipin bosturangko ra·bite dongjachina raken champenganiko on·ataha.

Uni gisepon, manigija niamrangko pe·ode, Bharatiya Nyaya Sanhita (BNS) Section 223-ni ning·o pangchake niam gita raka ja·kuko de·anggen ine District Administration mikrakataniko on·ataha.

Ia ge·etaniko song dam 37 chong·motan Hallidayganj, Kasharipara, Charkasaripara, Lalmati, Konarchar, Sobribari, Kharigaon, Panbari, Tetultulia, Borojhora, Jewali, Bollonggre, Jeldupara, Boldamgre, Guaragre, Nawalgre, Gansenggre, Masangpani, Gudibala (Katmil), Gomaijhora, Demdema, Belbari, Babilgre, Songjalgre, Shyamding, Chibinang, Kokaimari, Batabari, Mengkakgre, Chandigre, Rongkhon, Takimagre, Old Bhaitbari, Rajpur, Babulgre aro Bamundanga songni manderang dongimin niamrangko ja·rikpachina District Administration didiataha.

Pulisrangni u·iatani gitade, a·kawe jolrango jatsa jatgipin baksa dongbringipa biaprango ma·sisretanirang ong·anichi ding·chaogrikanirang ong·katenga.

Ia obostarang ja·mano gipin biaprangona gipangnaba gnang aro tom·tomgijanirang soknaba donga. Uni gimin tom·tomaniko ra·bapilna aro a·sel ong·gnirangko champengsona ia ja·kurangko de·na ga·akenga ine official parakataha.