Tura, April 12,2025: A·gilsak gimikni dal·begipa dakgrikani ba ‘First World War’-o an·tangtangko on·kange France a·songona re·angenba janggitangko gimaatgipa, A·chik Patgitchamrangko gisik ra·na uamangni bimingrangko see songdoe donenggipa gamchatgipa ro·ongko ba Cenotaph-ko Tura-o songdongenggipa manderang aro dingtang dingtang dolrang baksa agangrikchenga aro ku·mongchenga gri gital dake rikpiltaina pe·galahani gimin, Tura-ni Joint NGOs Forum, Mothers’ Union aro Civil Society Organization-rang, sakgni Officer-rangni kosako jegale a·dokni Skotong Minister Conrad K.Sangma-ko gronge, West Garo Hills a·jani Deputy Commissioner (DC) Jagdish Chelani aro Tura Municipal Board (TMB)-ni Chief Executive Officer (CEO) Rikse R.Marak-ko kam ra·jitangchina dabiahani gimin, ua officer sakgniko kam ra·jitataha.
Ua mamlao pangchake Joint NGOs Forum, Tura-ni Mothers’ Union aro Civil Society Organization-ni dabianiko knachake a·dokni Skotong Minister, West Garo Hills a·jani Deputy Commissioner Jagdish Chelani-ko Taxes-ni Commissioner aro Meghalaya State Skill Development Society (MSSDS)-ni Executive Director dake kam ra·jitangahani gimin uni biapo East Garo Hills a·jani Deputy Commissioner Vibhor Aggarwal-ko West Garo Hills a·jani Deputy Commissioner-na ra·jitbaskaaha.
A·dok sorkarioni u·iatani gitade, East Garo Hills a·jani Additional Deputy Commissioner (ADC) Reuben Ch Momin, East Garo Hills a·jani Deputy Commissioner ong·e jako ra·angskachina bilko on·angaha.
Unbaksana, Tura Municipal Board (TMB)-ni Chief Executive Officer (CEO) Rikse R Marak-ni biapo West Garo Hills-ni Additional Deputy Commisaioner (ADC) Florina Boro-ko TMB-ni CEO ong·e jako ra·angskagen ine parakataha.
