Tura, Sept 22, 2025: Garo Hills Autonomous District Council (GHADC)-o kam ka·enggiparangna ja 44-ni dormaharangko on·china dabie aro Tura Medical College-ko Public-Private Partnership (PPP) mode-o chalaina sorkarini miksonganiko jegale, Garo Hills-ni dingtang dingtang NGO-rang, da·al September 22 aro 23 tarikrango walgnina rama champengatna tik ka·ahani gimin, West Garo Hills a·jani District Magistrate, Section 44 Criminal Procedure Code (CrPC)-ko ra·gataha.

Ia niamko ra·gatanio mande sakbonga ba una bate tom·dakna, matsramgipa silchidarerang, go·olrang aro mandeko saknatgipa bosturangko ra·bite re·ramna man·jawa aro manderangni tom·tome donganiko golmal ong·ataniko District Magistrate champengataha.

Ramarangko champengate jingjengatanichi, so·sojengjeng ong·aniko ra·banaba donga ine West Garo Hills a·jani District Magistrate, ia niamrangko ra·gataha.

Ia niam retiko rakkienggipa sorkari official-rang aro nangchongmotgipa kamrangko ka·enggipa manderangnade nangchakeani dongjawa ineba District Magistrate talataniko on·ataha.
Tom·tomaniko rakkina man·na gita ia niamrangko ja·rikchina aro bakrimaniko on·pachina jolo songdongenggipa manderangko didiataha.

Uni gimin gital u·iataniko on·taikujaskal ia niamrang ong·angaigen aro ia niamrangko pe·genchimode, dongimin niamrango pangchake sastirangko man·gen ine District Magistrate mikrakataniko on·ataha.

Walo rama champenganiko September 22 tarik wal 9 bajioni a·bachenge September 23 tarik pring 5 bajiona aro September 23 tarik walni 9 bajioni September 24 tarik pring 5 bajiona ong·atenga.

GHADC-o kam ka·giparangni man·na nangenggipa ja 44-ni dormaharangko chu·gimik on·china, GHADC-o Service Rules, Finance Rules, Public Accounts Committee (PAC), Digital Transactions, Garo Customary Law (GCL)-ko ra·gatchina aro GHADC-na Separate Electoral Rolls (SER) ba dingtang Electoral Roll-rangko ta·rake a·bachengatchina dabie Garo Hills-ni dingtang dingtang NGO-rang, Garo Hills gimikon walo rama champengataniko ong·atenga.