@ghdnews.in@
.
Tura, Jan 17, 2026:West Garo Hills a·jani a·kawe jolrango niamgri chalaienggipa ro·ong quarry-rangko champengna kam ka·enggipa ACHIK dolni member Dilseng M Sangma-ko ma·sina man·gijagipa manderangni ka·saninggija chadrapenba so·ote galani ja·man, a·kawe jolrango niamgri chalaienggipa ro·ong quarry-rangko chipattokchina Garo Hills-ni Trinamool Congress (TMC) a·dok sorkario dabiangaha.

Sukrobar salo, Dadenggre-ni TMC MLA Rupa M Marak, Williamnagar-ni TMC MDC Alphonsus R Marak, Damas-ni TMC MDC Pardinand D Shira, Kharkutta-ni TMC MDC Cherak W Momin, Rongrong-ni TMC MDC Rinaldo K Sangma aro gipin dilgiparang, Wadagokgre aro Rongsanggre songrango niamgri chalaienggipa ro·ong quarry-ko nieangani ja·man, ua jolrango niamgri chalaienggipa quarry-rangko chipchina a·dok sorkako didingaha.

Re·anggipa January-ni 9 tariko Wadagokgre aro Rongsanggre songrango niamgri chalaienggipa ro·ong quarry-rangko chipatna re·angenba, re·bapilengmiting somoio ACHIK dolni member-rangko Goalgaon aro Kotchugre songni gisepo dolsa manderang ro·ong, rua, jompol aro uandakgipa silchidarerangchi chadrapsoaha aro ua manderangni chadrapanichi, ACHIK dolni member-rangoni saksa Dilseng M Sangma, rasong gribee so·otako man·aha.

Ua a·sel ong·aniko jegalatenba, Garo Hills-o niamgri a·ningni gamrangko bikotengani a·selsa ACHIK dolni member so·otako man·aha ine TMC-ni dilgiparang parakatenba, ua jolrango niamgri chalaienggipa ro·ong quarry-rangko ta·raken chipatchina a·dok sorkario dabiangaha.

So·ota man·gipa nokdangni manderangna ta·raken kakket bichalko on·china aro pilak nanganirangko dakchakchina gitaba TMC-ni dilgiparang, a·dok sorkario dabiangaha.

TMC dilgiparang Sukrobar salo Wadagokgre aro Rongsanggre songrangona re·ange niamgri bikotenggipa ro·ong quarry-rangko niangani ja·mano GHADC-ni Phulbari Range Officer-ko gronge, niamgri bikotenggipa ro·ong quarry-rangni gimin, sing·sandion, Phulbari Range Officer-ni parakatani gitade, batanggipa 2022 aro 2023 bilsirangon dam 35 niamgri chalaienggipa ro·ong quarry-rangko sandie list ka·enba, GHADC-ni Chief Forest Officer-na watatahachim. Indiba maini gimin, niamgri chalaienggipa ro·ong quarry-rangko chipatna man·ja, ine Kharkutta-ni MDC Cherak W.Momin sing·doatenba, ua somoio ia niamgri chalaienggipa ro·ong quarry-rangko chipatgenchimode, iandakgipa a·sel ong·jawachim aro mandeni janggiba gimajawachim ine Momin suk ong·gijaniko parakataha.

Mikkangchi iandakgipa a·selrang ong·taijana gita, ia niamgri chalaienggipa ro·ong quarry-rang gimikkon chipatna nangchongmota ine opposition MLA aro MDC-rang a·dok sorkari, district administration aro GHADC-ko chalaienggipa ruling EC-rango dabiangaha.

Apsan daken, Dilseng sagina ta·rake kakket bichalko on·china, Phulbari jolni nangrimgimin, NGO-rang Takimagre Skulni kal·chakram biapo tom·bimonganiko ong·ate, niamgri chalaienggipa ro·ong quarry-rangko chipatchina dabiangaha.