New Delhi, Jun 22, 2025: Iran aro Israel a·song damgnini gisepo dakgrikani ong·engon, Iran a·songo Nuclear tarichakgipa damgittam biaprangko United States (US) nosto ka·e galaha ine US a·songni President Donald Trump parakataha.
Donald Trump-ni parakatani gitade, Iran a·songo Nuclear man·anichi a·gilsak gimiknan kenchakani ong·enga. Iran a·songo nuclear tarianiko US a·song champengna ja·ku de·aha aro US a·songni sipairang, Iran a·songni nuclear tarichakgipa damgittam biaprangko chu·gimik nosto ka·e galna man·aha.
Iran a·song, nuclear-rangchi pangnan gipin a·songrangko ka·mikkenatrongachim, indiba da·ode uamang tom·tomaniona re·bana nanggnok. Uamang gipin a·songrang baksa tom·tomaniona re·bajagenchimode, mikkangchi Iran a·songko bilakbate aro altuen chadrapna man·aignok ine President Donald Trump aganaha.
Iran a·songni mongsonggipa damgittam nuclear tarichakgipa biapranga Fordow, Natanz aro Isfahan ong·achim, uarangko US sipairang bomarangchi godape nisigalaha ineba Trump parakataha.
Iran a·songko chadrapna ua, Israel a·songni Prime Minister Benjamin Netanyahu baksa kam ka·aha. Da·o Iran a·song tom·tomaniko am·ja ong·ode, America-ni sipairang, uamangko chadraptaigen ine Donald Trump parakataha.
US a·songni Iran a·songo Nuclear tarichakgipa biapko chadrapanina Iran a·songba, mongsonggipa Strait of Hormuz, cholgugako chipskana ka·mikkenatskaha.
