Tura, Feb 5, 2026:: Ia 2026 bilsini Union Budget-o jatko chalaienggipa ba re·dilenggipa Rural Local Bodies (RLB) ba songadam nokadamrango songgimin bimangrang aro Urban Local Bodies (ULB) ba town jillarangko chalaienggipa bimangrang bilrangko man·na siengahani gimin, ian manderangni namgnina miksonge tarigipa budget ong·a, ine BJP-ni State Vice President aro Union Budget BJP State Team-ni Convenor Bernard N Marak a·kangataha.

Jatko re·dilenggipa ba chalaienggipa bimangrang, Union Budget 2026-ni ning·o manderangna ku·chakgimin namgnirangko man·na gita an·tangtangan daitorangko ra·e kam ka·na nanga ineba Marak didiataha.

“Batanggimin bilsi 12-ni gisepo, damrang komie, tang·doanichi aro mangrakbegipa namroro silroroaniko ra·baanichi, Viksit Bharat-na pangchakaniko songaha. Ia kamrangan a·songo songdongenggipa nokdang ge·antina, jatantina aro gittimantina dingtang dingtang namgipa cholrangko ra·bagen” ine Marak parakataha.

Bernard Marak-ni parakatani gitade, Indiani Prime Minister Narendra Modi-ni dilanichi India sorkari, kangal cholgrirangna, “Sabka Saath, Sabka Vikas”-ni miksonganio nambata dakchakanirangko on·angkuna ku·mikchetenga.

Ia bilsini budget-o tangka paisani gita dal·roroatani, an·seng baljokaniko tang·doatani, lekka poraniko namdapatani, kal·susaanirangko namdapatani aro dingtang dingtang janggi tangani cholrangko on·dapangkuna, Tourism-ko namdapatna aro gama ge·anirango tang·doatna niksamsoanirang donga ine BJP-ni State Vice President parakataha.