Tura, May 22,2025: Tura Rishipara gittimni ma·ningsa sakgni kragijagipa video-ko social media-o watani ja·man, nokoni kate dongenga ine kobor man·aha.
Rishipara Development Committee-ni President Swapan Rishi, ua me·chikmani kragijagipa video-ko re·anggipa April 23 tariko uni facebook-o watako nikaha. Ua me·chikma facebook-o watani salgipinon, ua me·chikma aro bilsi 8 ong·gipa uni demechik nokoni gimaaha.
Gimaenggipa me·chikmani segipa April 25 tariko Tura Women Pulis Station-o FIR ka·aha. Indake, April 26 tariko uko Pulis Station-ona okamaton, ua uni jikgipa aro demechikko Pulis Station-on dos dakgipa mande baksa nikeaha. Dos dakgipa mandeko rim·ani pal Pulis Station-ni Officer In-charge me·chikni segipako Rishipara-ona re·angjachina beng·aha. Salgipino uamang Assam-ni Dudhnoi-ona katange dongeaha. Ua jikgipni duk aro kratchaaniko komiatna, jikdrangko Bengaluru songjinmaona rimange, ma·drangni noko doneahachim, indiba May 12 tarikonin uni jikgipa aro bilsi 8-ni demechik gimaenga.
Dos dakgipa mandeko rim·ani pal Rishipara-ni manderang maming dakjaha. Dos dakgipa mande da·onaba jakgitele re·rame rokuaenga.
Iani gimin West Garo Hills Pulis name kamrangko ka·chakatengaha aro Benglaru pulisrang baksa agangrike ua gimaenggipa ma·ningsako sandina a·bachengengaha ine Tura-ni SP aganaha.
