@ghdnews.in@

Tura, Nov. 9, 2025: A·chik a·songni namgnina, Meghalaya a·dokni Skotong Minister Pa Conrad K. Sangma, Tura Dakopgre-o gital rikgipa Meghalaya Public Service Commission (MPSC) office nokko oprake on·angaha.

Skotong Minister-ni aganangani gitade, MPSC-ni porikkako re·baengipa November, 14 tariko a·bachengatgen ine ku·watangaha.

Uandake tom·a matchotani ja·mano Garoland State Movement Committee (GSMC)-ni Acting Chairman Balkarin Ch. Marak, Co-Chairman Jakrak A. Sangma, General Secretary Tony Tojrang B. Marak unikoa gipin dilgiparang Skotong Minister-ko gronge memorandum-ko on·angaha.

GSMC dilgiparangni Skotong Minister-ko gronge memorandum on·angani mongsongipa miksonganiara, MPSC-ni Secretary ba Chairman-ko Garo Hills Region-o songchina unikoa gipin office staff-rangko seoke on·china dabiangaha.

Unbaksana, MPSC-ni Secretary Pa A.M. Sangma-koba gronge, Tura Dakopgre-o rikgipa MPSC office-ni chu·gimik nanganirangko Tura-on matchotatchina gitaba dabiangaha.

GSMC-ni dabianirangko knachake Skotong Minister chu·sokatna ku·watangahani gimin GSMC-ni Co-Chairman Jakrak A. Sangma, A·chik A·songni mingsa nangchongmotgipa MPSC office-ko man·bae on·ahani gimin, A·chik A·song gimikni palo Skotong Minister-ko mittelataha. Mikkangchi MPSC porikkarango sesusana altuagipa cholko man·ahani gimin, A·chik chadamberang namgniko man·gnok. Uni gimin chu·onge, dangdikgiparangko on·china didiatan baksa mikkim rasongko ra·bae chu·sokatanina bil gnanggipa dilgiparangko GSMC mittelataha.