@ghdnews.in@

Tura, Nov 29, 2025: Tura-ko Nitoatna, ‘Heal the World’ ine pangchakaniko done, Sukrobar salo Tura Municipal Board, dingtangmancha program-ko Tura District Auditorium-o ong·atangenba, ia program-o a·dokni Skotong Minister Conrad K Sangma, mongsonggipa sokgipa ong·e, bak ra·angaha aro re·baenggipa 2027 bilsio sokachakna sienggipa National Games-na tarisamsoani bak gita, Tura songjinmako taridapna niksamsoaniko chu·sokatna gita dingtang dingtang kamrangko jinmana parakangaha.

Ia program-ko a·bachengatanio, Tura Municipal Board (TMB)-ni Chairman JD Sangma, rimchaksoani kattarangko aganangaha aro West Garo Hills a·jani Deputy Commissioner Vibhor Aggarwal, program-o bak ra·enggipa manderangna mande ra·pilskaaniko dakangaha.

Ia program-ko ong·atanio, dingtang dingtang Area Development Committee (ADC)-ni dilgiparang, gittimtangtango namroro silroroaniko agan-talate on·angaha. Indake ia program-ko ong·atanio MGMP-ni git ring·giparang gitrangko ring·e manderangko an·saoatangaha.

Ia tom·anio a·dokni Skotong Minister, jinmana aganprakangengon, a·doko namroro silroroaniko ra·bana gita sorkarini miksongenggipa kamrangko parake on·angaha.

Tura-o gong kror 145-ni Five Star Hotel-ko, Park Hotel brand baksa nangrime rikna Hilton Group, tender-ko man·aha ine parakatenba, ia five-star hotel-ko ja 36-ni gisepon matchotatna ka·dongenga aro ian Garo Hills-o skanggipa five-star hotel ong·gen ine Skotong Minister parakataha.

Re·baenggipa 2027 bilsio ong·atna sienggipa National Games-ni mingdok ba mingsni kal·susaanirangko Tura-o sokachakna tarisamsoenga. Ua kal·susagiparangna aro official-rangna komibeoba ge 600 kuturirangko tarisona nangenga aro iana 60 percent subsidy donggipa homestay scheme-ko sorkari a·bachengatahani gimin ian National Games-nasan ong·aigija, ja·mano tourism-ni kamrangna bang·en dakchakani ong·gen ine Skotong Minister parakataha.

Ia kamni ning·o komibeoba ge 350 kuturirangna dakchakaniko on·na man·na gita sak 30 ba 35-mangni gita gital dorgasto galgiparangko ta·rakatchina Skotong Minister didiangaha.

Tura-o re·a doani kolrangko nambatatna aro samtangtango ong·telaigiparangko ripingna kam ka·ani bak gita 2027 bilsina skangan electric auto aro bus garirangko a·bachengatna, miksongenga ineba Skotong Minister parakataha.

Petrol auto-rangko EV model dake tarina bakan auto association-rang baksa tom·e chanchirimgen.Tura-o bangbang ong·gipa children park-rangko aro budepa butchumarangna rochakani biaprangko tarina gita a·a nokgiparangko aro dingtang dingtang dolrangko sorkari baksa bakrimchina Sangma didiangaha.

A·doko drugs ba pekatgipa samrangko jakkalanirang batroroengani gimin ja 3 ba ja 6-ni gisepon a·ja ge·antion rehabilitation centre-rangko kulignok aro iandakgipa kamrangko nambate nirokna man·na gita dingtang dingtang biaprango CCTV camera-rangko dona baksana street light-rangko taridape, songo noko nirokna village defence party (VDP)-rangko songe on·gen ineba Skotong Minister parakataha.

Ia program-ko ong·atanio, Tura-ko nitobatatna aro rongtal an·talatna gita dingtang dingtang area development committee-rangna gong lak 38-ni cheque-rangkoba Skotong Minister sualataha.

Indake tom·anio, Tura Municipal Board-ni Senior Medical & Health Officer Dr Amanda Salchira W Momin, mittelpilani kattarangko aganangskaaha.