@ghdnews.in@

Tura, Feb 18, 2026::Chang 25-gipa Bharat Rang Mahotsav (BRM) 2026-ko National Skul of Drama (NSD)-ni bak gita a·gilsak gimiko dal·batsranggipa dakmesokaniko gisik ra·e, ma·mong sorkarini Ministry of Culture Monggolbar salo Tura-ni District Auditorium-o ong·atangaha.

Ia program-ona Tura-ni MDC Bernard N Marak mongsonggipa sokgipa ong·e bakko ra·angaha. Unbaksana North-Eastern Hill University Tura Campus-ni Pro Vice Chancellor Prof. Sujata Gurudev-ba dongpae bak ra·angaha.

Ia manianiko ‘Samvad Sanskritiyon Ka’ ba dingtang dingtang jatni dakbewalrangko daksningna sakgipinrang baksa agangrikna, ‘Theatre Festival’ ine katta bichongko done maniangaha. Meghalaya damsa nitogipa a·dok ong·e, an·tangtangni changa sapaniko dakmesokna namgipa chol ong·a ine NSD-ni Director Chittaranjan Tripathy aganangaha.

Ia manianio Tura-ni A·chik Theatre minggni jawilwatrangko mesokangaha. Skanggipao Balsrame A Sangma-ni A·chik ku·sikchi segipa ‘Ku·bilbat Muni’ jawilwat-ko mesokangaha. Gnigipao Jyoti Narayan Nath aro Anubhav-ni tarigipa ‘The Wise Creature’ jawilwat-ko mesokangskaaha. Indake chang 25-gipa BRM 2026-ni manianiko sal 25-na ong·atenga, jekon January 27 tarikoni February 20 tarikona a·gilsak gimikni ge 277 dakmesokaniko dingtang dingtang biaprango ge 288 India-ni aro gipin a·songrangni ku·sikchi mesokangenga. Ia manianio dam 9 a·songrang, a·dokrang aro Union Territory-ni dakmesokgipa dolrang bakko ra·angenga.

National Skul of Drama ba dakmesokgipa biaprangko bariate gipatna rake kamrangko ka·enba, Rang Akash, internet radio-ko OTT platform Natyam-ko an·tangtangni changa sapaniko mesokna a·bachengate on·angaha.

Ia program-o Jyoti Narayan Nath, NSD-ni palo agan talate on·angaha. Indake bon·kamao A·chik Theatre-ni President Jameswarth Ch Sangma mitelpilskaani kattarangko aganangskaaha.