Tura, Feb 14, 2026: Nangrimgimin A·chik Dol (NAD), re·anggipa January 9 tariko Dilseng M.Sangma-ko rorirang ka·saninggija so·ote galgipa manderangko pasi on·china aro ta·rake kakket bichalko on·china dabie, February 13 tariko Tura-ni Te·teng a·jao donggipa Govt. College Field-o dal·begipa tom·bimonganiko ong·ate, jinma re·jomangaha.

Ia tom·bimonganio A·chik a·songni manderang sak hajalni hajal bakko ra·angtokaha, unbaksana Khasi Jaintia a·jani NGO dilgiparangba re·bae A·chikrangna chakpaaniko on·angaha. Indake tom·anio Rev. Frigthing D.Sangma-ni dilachi, tom·bagipa manderang, A·chik a·songko namgijagipa rorirangoni chel·chakchina a·ako rim·e ku·mikchetangenba, ‘A·chik a·songde, Jisu-nin,’ ine A·chik a·songko Nokgipa Isolna pakwatangaha.

Indake ia tom·bimonganio NAD mingchet (8) ra·gatgimin Resolution-rangko jinma pass ka·e ra·chakangtokaha.

NAD-ni ra·chakanggimin Resolution-rangara, Dilseng Sangma-ko so·otanio jak donggipa manderangko pasi on·na nanga. Gnigipa Dilseng Sangma-ni nokdangna a·dok sorkari Ex-Gratia lak 50-ko on·na nanga. Gittamgipa GHADC election-o Garo Tribalrangsan vote pu·onna aro susana man·aigen. Brigipa Seperate Electoral Roll-ko tarina nangchongmota. Bongagipa Bajar Committee A·chikrangsa ong·na nanga. Dokgipa Sixth Schedule-ko A·chikrangna on·gimin bilko pe·na man·jawa. Snigipa dingtangmancha Muslim-rangko A·chik songo napna on·jawa aro A·chik songo bading chiwale cha·na on·jawa. Chetgipa niamgri A·chik a·songona napdrabae donggiparangko ta·raken a·rikgalna nanga.

Indake tom·bagipa manderang, College Field-oni a·bachenge, Hawakana petrol pump aro Member Hostel samba gita, Lower Babupara aro DC office, Tura supper market-ko napake, Hawakana rama dilmong gita Te·tengkol rama jangchiko napake Te·teng a·ja College Field-ona jinma re·jome matchotateaha.