@ghdnews.in@

GHD News, Tura, Nov 20, 2025: Bristibar pringo, Tura Nehru Park sambao donggipa Bokmagre-o adita sak manderang, a·a cho·miting somoio, rang·gitik kosakni a·a be·dape sakgni manderang siaha aro gipin sakgittam manderang, bilongbee saknaako man·aha.

Indake rang·gitik a·sel ong·ani ja·man, District Disaster Management Authority-ni manderang aro pulisrang a·a be·dapa man·gipa sakgittam manderangkode tange ra·ongkatna man·aha, indiba sakgni manderangde an·tangtangni janggiko gimaataha.

A·sel ong·ani bakan pulisrangna kobor on·atahani gimin, a·sel ong·gipa biapona pulisrangko watataha ine West Garo Hills a·jani Superintendent of Pulis (SP) Abraham T Sangma parakataha.

SP-ni parakatani gitade, a·a be·dape sigipa mande sakgnini manggisiko ra·ongkatenba, saknaa man·gipa manderangko Tura Civil Hospital-ona ra·angaha.

Ua biapo kam ka·enggipa manderangara Assam-oni ong·achim, aro ua manderang, batanggipa salrangonin ua biapo kam ka·engachim ine parakataha.