www.ghdnews.in#

Tura, Feb 24, 2026: Tura NEHU Campus-o poraienggipa, Post Graduate Students’ Union (PGSU), Assistant Dean Students Welfare (ADSW)-ni dilachi February 23 tariko tom·aniko ong·ate, faculty member-rangni dongpaanio Post Graduate Students Union-na gital dilgiparangko seokangaha.

PGSU-ni gitcham Vice President Chakram Do·po Sangma batanggimin sal somoirango ong·anggimin Union-ni history-ko nipilate, tom·anio, aganangengon, bilsibri mangna 2022 bilsionin Tura NEHU Campus-o Students dilgiparang gri ong·aha. Uni giminsa re·anggipa bilsio chatro chatrirang apsan ku·monge, Union-ko interim body-ko songtaie, ka·donganiko man·piltaiaha aro PGSU tangchapilaha ine aganaha.

Bilsibrini ja·mano, NEHUSU, 2021-ni Resolution aro Constitution-o pangchake, bon·kamo chu·gimik Students Union Body-ko songpiltaiaha. Indake Executive Council-ni meeting-o constitute ka·e, PGSU-ni constitution-o pangchake Union-ni dabianirangko scrutinize ka·aha, ineba Chakram Sangma aganaha.

Uandake tom·anio gitcham Vice President PGSU-ni office aro document-rangko pakwate, gital seoka man·gipa dilgiparangna kusi ong·chakaniko parakangenba, Students Dilgiparangni mongsonggipa ka·gni kamrangara, “Student-rangni Rights-ko chel·chakani aro university-o ong·enggipa pilak obostarangko nirok simsakanian ong·a” ine gitcham Vice President agandapangaha.

Seoka man·gipa PGSU-ni gital dilgiparangara Vice-President Te Joyshelman D. Sangma (4th Semester, Horticulture), Secretary Te Balpang K. Sangma (4th Semester, MBA), Assistant Secretary Te Andy Tengsram D. Sangma (2nd Semester, Horticulture), Finance Secretary Tra Lenysa M. Marak (4th Semester, MBA), Games and Sports Secretary Tra Jumesha M. Marak (4th Semester, MBA), Publicity Secretary Tra Anname Shalisha A. Sangma (2nd Semester, Forestry), Socio-Cultural Secretary Tra Roda Onchiba N. Sangma (4th Semester, Horticulture), Academic Secretary Tra Mitchira Ch. Marak (4th Semester, English) aro Editor Te Abihail Mingku N. Marak (2nd Semester, English).

Tom·anio PGSU-ni gital seokako man·gipa Vice President aro uni team Tura NEHU Campus-o poraienggipa chatro chatrirangni namgnina raken kamrangko ka·angna man·gen ine ka·donganiko parakangaha.

Tura NEHU Campus-ko a·bachengaoni, da·alo February 23 tariko bilsi 30 gapaniko gisik ra·ate, Tura NEHU Campus-o chagronganggimin obostarangko nipilate, manderangni bil gnange ra·bia gnang kam ka·anichisa ong·aha ine gital Vice President aganangaha.

PGSU-ni gital dilgiparang mikkangchi skigiparang aro chatro chatrirang baksa apsan ku·monge, Tura NEHU Campus-ni namroro silroroanina kamrangko ka·angna ku·rachakangaha, ine PGSU-ni Publicity Secretary Tra Shalisha A.Sangma parakataha.