Shillong, May 24,2025: Tura-o rikenggipa Govt. Medical College-ko Public-Private Partnership (PPP) mode-o chalaina sorkari tik ka·a ong·ode, iani kosako raken jegalangkugen ine Sukrobar salo, Leader of Opposition aro TMC-ni dilgipa Dr. Mukul M. Sangma, ku·rachakangaha.

Tura-o rikenggipa Govt. Medical College-o bilsianti sak 150 MBBS chatro chatrirangko ra·e, PPP mode-o chalaina sikenggipa aro kamna choligipa, India-ni Private Company-rang baksa bakrimna a·dok sorkari, Expression of Interest-na okamahani gimin Opposition dolni dilgipa, raken jegalangna tik ka·aha.

An·seng baljokani aro lekka porani kamrangko Private Company-rangni jako on·jachina sorkariko didiatenba, Medical College-rangara a·doko mongsonggipa sanchakram biaprang ong·a aro a·dok sorkarichi chalaienggipa Medical College-rangko, a·dokni manderangna nangchongmotenga, ine Sangma parakataha.

Da·ororo bang·a nokdangrangan sanna bananio korosrangko amchaktokjaengani a·sel neng·nikanirangko chagrongtokenga ine janapatenba, Sorkari Medical College-ko kulianichi pilakan Medical College aro hospital-o sanna bananirangko ra·pana chol ong·gen ine Sangma parakataha.

Sanna bananirango agrepile dam rakdugaengani a·sel, bang·a nokdangrang, gro jinang nangtokengani gimin manderang, sorkarini sanchakram biaprango sanna bananirangko ra·na man·na gita sorkari cholrangko on·na nanga. Tura Medical College & Hospital-ko PPP mode-o chalaigenchimode, a·dokna mikkangchi namen gimaaniko ra·bagen. Uni gimin ia Tura Medical College aro Hospital-ko Private Company-chi chalaigija sorkarian chalaichina Opposition dolni dilgipa, a·dok sorkariko didiataha.

Ia Tura Medical College aro Hospital-ko PPP mode-o a·bachengatgen, indiba ja·manode chu·gimikan Private Hospital-sa ong·aignok. Uni gimin a·doko songdongenggipa manderangni namgnina ia Tura Medical College-ko PPP mode-o chalaigija, chu·gimik sorkarian chalaina nanga, ine Dr. Sangma a·kangataha.