Jowai, May 15,2025: Tura-ko Winter Capital songchina gita Garo Hills-ni dingtang dingtang NGO-rang dabiengani gimin, sorkari ua dabianiko chu·sokate on·genchimode, Jowai-koba Summer Capital songskana nanga ine Jaintia Students Union (JSU) dabiangskaha.

JSU-ni General Secretary Neilkee Mukhim-ni parakatani gitade, Meghalaya a·doko mongsonggipa jatrang, chong·motan Khasi, Garo aro Jaintia-rangan ong·a aro a·dokni pilak biaprangon apsan dake namroro silroroaniko on·na gita ia jatgittamnan apsan dake cholrangko on·na nanga. Ru·uta bilsirangonin Jaintia Hills a·jarango pilakni gitan namroro silroroanirang dongkujaenga ine janapatenba, Jowai-ko Summer Capital songgenchimode, Jaintia Hills-oba namroro silroroaniko ra·bana, pilak cholrangko on·ani gita ong·gen ine JSU parakataha.

Badiaba biaprangkosan mikkang nitee kamrangko ka·genchimode, Jaintia Hills-ni manderangna, chu·ongnikgijani ong·skagen ine JSU mikrakataniko on·ataha.
“Badiaba jolrangnasan mikkang niteani donggenchimode, Jaintia Hills a·jao songdongenggipa manderang baksa, JSU an·tangtangni bak rengsiko man·na gita jingjengatanirangko dakna draatani ong·gen” ineba JSU mikkrakataha.

Tura-ko Winter Capital songchina dabienggipani bidingo chanchirimna gita Meghalaya sorkari, pilak political party-ni dilgiparangko Committee songaha. Ua Committee-o pilak political party-rangoni sakgni member-rang bak ong·china sorkari u·iataha.

Ua Committee-ni chanchirimanio dingtang dingtang sorkari department-rangkoba bak ra·na okamna sienga. Ua Committee-ni mongsonggipa kamara, Tura-ko Winter Capital songanio namgni aro namgijaniko niani ong·gen. Iani bidingo Committee, a·doko songdongenggipa aro dingtang dingtang dolrangni chanchianirangko ra·e ja·mano a·dok sorkarina report-ko on·pilgen, ineba parakataha.