@ghdnews.in@

Tura, Feb 11, 2026: Viksit Bharat – Guarantee for Rozgar & Ajeevika Mission (Gramin) ba VB-GRAM G-ni bidingo agan-talataniko on·na aro apsan chanchirimna gita Monggolbar salo, Shillong-ni Press Information Bureau (PIB), West Garo Hills District Administration baksa nangrime, dingtangmancha Vartalap ba agan-chanchirimani program-ko Tura DRDA Conference Hall-o ong·atangaha.

Ia program-ko ong·atanio, district official-rang, media-ni manderang, chatro chatrirang aro dingtang dingtang dolrangba bak ra·angtokaha. Ia program-ko ong·atanio, West Garo Hills DRDA-ni Project Director aro ADC Nipon Hajong, jinmana aganprakengon, 2047 bilsini gisepo India a·songko tang·dogimin a·song ong·atna miksonganio maikai VB-GRAM G-ara Viksit Bharat @2027 baksa bak ong·achim, uarangni gimin agan-talate on·angaha.

VB-GRAM G-ni namgnirangko talate on·angengon, ia scheme-ni ning·o kam ka·e cha·ani salrangko bariatahani gimin, somoi gita hajirarangko on·ani niamrang dongani gimin, songni nokni gam-jinrangko janggi tangani cholrangna jakkalani gimin aro maikai iachi songni manderangna kam ka·e cha·ani cholrang aro janggi tangani cholrangko on·na man·gen, uarangni gimin Hajong janapangaha.

Ia program-ko ong·atanio, Rongram C&RD Block-ni BDO Cherime WR Sangma-ba jinmana aganprakengon, VB-G RAM G scheme-ni miksonganirangko aro niamrangko talate on·angenba, scheme-ko chu·sokgipa ong·atna pilaknin bakrimaniko nanga ine aganaha.

Ia tom·anio, NRLM, MSRLS-ni District Mission Manager Michelle Ch Momin-ba jinmana aganprakengon, VB-G RAM G scheme-ni Ajeevika bakni bidingo talatanirangko on·angskaenba, maikai National Rural Livelihoods Mission (NRLM)-ni ning·o songni nokni manderangna janggi tangani cholrangko on·na man·a, uarangni bidingo agan-talatangskaha.

Ia program-ko ong·atanio PIB Shillong-ni Assistant Director Gopajit Das, ia Vartalap program-ko ong·atani bidingo agan-talate on·angskaha.