Tripura, April 6, 2026: Tripura Tribal Areas Autonomous District Council (TTAADC) eleksin sepangbaengon, jajrenganirang batrikrikenga, indake ong·engon, April 5 tarik Robibar salo BJP eleksin office-ko ma·sina man·gijagipa manderang wa·al so·aha aro sak 10 party-na kam ka·giparang baksa candidate saksako man·chape, Sepahijala a·jao a·sel ong·anichi bilongen saknaanirangko man·tokaha.

BJP dilgiparangni parakani gitade, Pekurjala Janmejoynagar constituency-ni party candidate, Majee Debbarma-ni nokantiona re·roroe campaign ka·engmitting somoio a·sel ong·anichi uni skoo saknaako man·aha. Uandake ma·sina man·gijagipa dolsa manderangni chadrapanio mikkangchake party-na kam ka·enggipa manderangni garirangko nosto ka·aha aro uamangko doka sataha ine koborko man·aha.

Sepahijala Sabhadhipati Supria Das Datta-ni matnangani gitade, chadrapani ja·pangara, Tripra Motha Party-ko wate, BJP pary-na chakgipa manderangko nisan done, kajiako a·bachengataha ine nikna gita man·aha.
“Bang·bea manderangni BJP party-o napanganiara maiba namgijani ong·ahama, maini gimin indake manderangni kosako ong·gija chadrapaniko dakaha aro manderangko saknaata. Ia a·sel ong·aniko chinga raken jegala,” ine Datta aganaha.

Mingipin a·sel ong·aniara, Nalchal Assembly constituency-o donggipa BJP eleksin office-ko Robibar walo wa·al so·ani a·sel, Tripura Panchayat Minister Kishor Barman saknaako man·aha. Party office-ko ma·sina man·gijagipa manderang wa·al so·engaha ine party-na kam ka·giparang koborko man·soaha ine Barman aganaha.

Barman-ni parakata gitade, BJP party-na kam ka·giparang sak 8 ba sak 9 manderang saknaako man·aha aro uamangko bakan sanna gita ra·angaha. Ian Tipra Motha Party-na chakgiparangni chadrapanio uamang go·olrang aro rod-rangko jakkale doka satanirangko dakani a·sel ong·aha aro iandakgipa a·selrang a·doko political violance ong·enga, ine Barman, Tripra Motha Party-ko jaksi otaha.

“Indake kajia golmalrang ong·gen ine, BJP chanchisojachim, indiba iandakgipa kamrangchi eleksin cheaniko champengna ba dontongatna man·jawa. Ia chadrapaniko chinga raken jegala,” ineba ua agandapataha.

Ia ong·gija dakanirangko Tipra Motha Party ong·ama, ong·ja maming aganchakaniko on·kuja. Indiba jensalo chel·chakgipa dolrangko chu·onga gita donatdapgen, unosa campaign-ko a·bachengtaigen aro TTAADC-na pu·onaniko ong·atgen ine parakataha.