Chokpot, April 5, 2026: Gari Hills Autonomous District Council (GHADC)-ni gitcham Deputy Chief Executive Member (CEM, Land & Revenue-ni Incharge aro Rongrikkimgre GDC elakkani MDC Pa Nikman Ch.Marak, an·tangni kosako tol·e badi (FIR) ka·gipa manderangni kosako South Garo Hills a·jani Chokpot Pulis Station-o Counter FIR ba badi ka·doangskaha.

“Angni Deputy CEM ong·e kamko ka·miting somoio, chong·motan re·anggipa February-ni 27 tariko, Nokma saksako biming segatani bidingo order-ko on·aha. Iako anga mesokgimin sakkirang baksa nanggipa lekkarango pangchake, niam gita kam ka·aha. Indiba, East Garo Hills a·jani Dorakgre songni Rikme T. Sangma, Court-ni rai on·ako ba Order-ko jegale Nokma gataha ine angko matnangenba, angni kosako Chiading Pulis Station-o tol·e FIR ka·aha. Anga saksan Nokmako gatna man·ja, Nokmani Chra-depanterang, mahari-ma·drang baksa uamangni on·gimin lekkarangko court-o register ka·e on·na gitasa man·aia. Uamang maming saloba Court-ko case ka·na man·ja, uamang nangnika ong·ode, CEM-ni Court-o appeal ka·nasa man·a” ine Marak talataniko on·ataha.

Ua FIR-o “Angni kosako janapgimin kattarangara chu·gimikan kakket ong·ja, tol·esa angko personally FIR ka·aniara maming pangchakani gri. Ian angko neng·nikatnasa dakaha. Ia FIR ka·aniko Social Media-rango, songbad-rango aro gipin social media platform-rango parakatenba, angni gimin tol·e gipatanichi, manderangko aro angni elakkani manderangko jajaatna aro angko namgija biming man·atna aro angni manderangko nosto ka·na miksonganisa ong·ai” ine Rongrikkimgre-ni MDC parakataha.

Iandakgipa kattarangko Social Media-rango niksoe, “Anga namen gisiko dukko man·aha aro kratcha·atanko man·aha. Uan niam gita ong·gija, angni bimingko nosto ka·na aro pressure ong·atna miksongmanchaesa tol·e u·iatanirangko on·aha aro Court-ni niamko pe·aha” ineba Marak janapataha.

Uni gimin, Rikme T. Sangma aro gipinrang jean FIR ka·anio bak ra·gipa, tol·e u·iatgipa, biming nosto ka·gipa aro neng·nikatgipa manderangni kosako case register ka·e niam gita rakgipa ja·kuko de·china didiatenba, iani bidingo namedake sandianirangko dakchina aro mikkangchi iandakgipa obostarang ong·taijachina, Marak Pulis Officer Incharge-ko didiataha.