Tura, Aug 25,2024: Re·baenggipa Gambegre by-election-o a·dokni gitcham Minister Zenith M. Sangma-ni jikgipa aro Dengnakpara-ni MDC Sadhia Rani M Sangma-ko Trinamool Congress (TMC)-ni candidate ong·e susaatna tik ka·aha, indiba da·o TMC High Command-ni ra·chakaniko sengkuenga ine parakataha.
Iani bidingo kobor ra·timgiparangna aganengon, TMC-ni State President Charles Pyngrope aro TMC Election Committee-ni member-rang, Sadhia Rani Sangma-kon TMC-ni candidate-na tik ka·aha aro uni bimingko High Command-ona watatna gitaba tik ka·aha ine Sukrobar salo, TMC Parliamentary Party-ni dilgipa Dr Mukul Sangma parakataha.
Gambegre by-election-na TMC-ni candidate-ko jinmana parakatna skang, high command-ni ra·chakaniko sengkugen ineba ua aganaha.
Gambegre by-election-o chena gita TMC-ni party worker-rang rakbee kamrangko ka·soengaha ineba Dr. Sangma parakataha.
“Chingo sak 5 MLA-rang donga aro ia sak 5 MLA-rangoni sakgnide skanggipa changna seokako man·gipa membor-rang ong·a. Gital political dolko rikanide altua ong·ja aro dingtang dingtang neng·nikanirangko chagrongna nangaia. Gital party-ko rikanio chakchikna nanga aro chingni ia gital party-ko rikanio ching baksa bakrimgipa manderang sakantikon chinga mittelpilna sika” ine Dr. Sangma aganaha.
