Tikrikilla, May 19, 2025: West Garo Hills a·jao donggipa Tikrikilla Primary Health Centre (PHC)-o bi·sarangna birth certificate tariani bidingo manderang namen neng·nikanirangko man·enga, ine songni manderang u·iataha.
Songni manderangni u·iatani gitade, ma·gipa pagiparang bi·sarangko ba·bite walni 12 baji ba 1 bajimangon Tikrikilla PHC-ona re·bae, lekkako line dake donenga, pringni 4 ba 5 bijio line dakgipade somoikon srapjachim. Birth Certificate tarigipa Office-ko pring 10 bjioni 2 bajiona kuliani gimin, salo sak 50 ba 60 mangsan Birth Certificate-ko tarina man·aia. Line dakgiparang salo sak 100 mangna baten gnang.
Chel·begipa songni manderang waloni re·bajaode, somoikon sraptelja, uni gisepon waloni re·bae ramarango maiba a·sel ong·na nangode, sawa daitoko ra·gen, ine kenchakaniko parakataha.
Tikrikilla PHC-o birth certificate tarina japrako sal 6 mangmangsan somoi on·ani a·sel manderang somoiko dingtangatchina aro salko bariatchina didiatenba, mikkangchi maiba a·sel ong·naba donga ingipao kenchakaniko parakataha.
