Tura, May 16, 2025: Northeast Institude of Professional Studies (NeIPS) aro NABARD melie, re·anggipa Monggolbar salo, West Garo Hills a·jani Tikkrikilla-o Entrepreneurship program-ko ong·atangaha.
Ia training program matchotani ja·mano Certificate aro Startup-na dakchakgipa, bosturangko suale on·angjolaha.
Program-ko Kyrshanbor Jala dilangaha aro ia program-ni mongsonggipa sokgipa NABARD-ni DDM, Kitmiller Sangma aro Rev Fr. Joseph Binoy guest of honour ong·e bakko ra·angaha.NeIPS-ni Skotong Lamshai Thongni-ba bakko ra·e, ia program-ni namgninirangko talate on·angaha.
Lamshai Thongni-ni talatani gitade, Michael Thongni-ni dilanichi, NeIPS a·songni chadamberangna sika-koanirangko skie on·nenga. Uasan ong·aija, training-o donggipa sakpraknan matchotani ja·mano certificate aro sika-koani sewing machine-koba on·rongachim. Jean uamangna mikkangchi janggi tangna gita cholko bikoatanio dakchakani ong·achim..
Ua (Michael Thongni) skie ra·na re·bagipa sakantinan nama kattarangko agane rimchaksoaha aro program-o bakko ra·ani namgnikoba agane, mikkangchi name dakangchina ku·pattiangaha.
Mangsonggipa sokgipa, Kitmiller Sangma, skie ra·na re·bagiparang baksa adita golpoaniko dakangaha. Maina uamangara janggi tangani cholko man·pajae tikkelani ba neng·nikanirangko, ma·sichakenba, ka·dimeatani kattarangko agane, NABARD-ni dingtang dingtang scheme-rangni gimin talatangaha.
Una agreba, mande ra·na kragipa, Rev. Fr Joseph Binoy, ia namgipa cholko gisik nange ra·enba, an·tangtangni changa-sapaniko bariatchina aro an·tangtangni ma·sinrangko jakkale janggi tangna gita cholko bikotchina didiangaha.
Bon·chotao, ua indake agane matchotataha, “Sonako bikotgipa biapo asonge somoiko re·atnabe, indiba sonarangko bikote uarangko jakkalbo”.
