Kharkutta, Feb 27, 2026: Re·baenggipa GHADC election-o Kharkutta GHADC elakkaoni susana an·tangko on·kanggipa aro A·chik a·songna ka·sagipa, mikkangchi jattangko chuatna krenge kamko ka·gipa saksa Candidate Pa Tengkal N. Arengh an·tangna kam ka·giparang baksa February 27 tariko Garo National Council (GNC) dolo napeaha, ine GNC Centre Executive Committee, Media Cell-oni u·iataha.

Pa Tengkal Arengh Kharkutta GHADC elakka-oni GNC candidate ong·e susana, A·chik jatni dol GNC-ko namnike, GNC dolko baseaha. Indaken ua GNC-ni candidate ong·e Kharkutta elakka-oni susana GNC dolni tikitko ra·angaha.

Pa Arengh an·tangni manderang baksa, GNC-CEC-ni Ma·dot Kalpana D. Sangma-ona re·bae, A·chik dolko rikna ka·kimchae aro an·tangko on·kange, GNC dolo napeanina, Ma Sangma uamangko mittele, maming on·ani dongjaoba, A·chik jatna dangdike on·na namgipa dol ong·a ine parakataha.

“GNC dolo uni napaniara, GHADC-ko man·badilchenggipa GNC dolan ong·a. Uni gimin, GNC dolan A·chik a·songko nambate rikna man·gen ine nikenba, anga GNC dolko namnike baseaha” ine Pa Arengh aganaha.

“Chinga da·al dipet Kharkutta-o GNC dolko su·songaha. Chinga A·chik ong·e, GNC dolo napna an·tangtangko on·kangaha aro Kharkutta-o GNC candidate-koba seokaha. Jedakode mikkangchi A·chik jatni GNC dolko bilakatna, jat aro a·songna dangdike on·na man·gen, ine chinga ka·donga. Chinga man·adipet jattangna dangdike on·na gita candidate-ko baseaha aro chinga apsan ku·monge, an·tangtangko on·kangaha” ine Kharkutta-ni dilgipa saksa aganaha.