Tura, Dec 22, 2024: December 19-21 tarikona Garo Hills Talent Development Society (GHTDS)-ni Tura District Auditorium-o ong·atanggipa Talent Hunt Session 13 tom·tome aro nambee matchotangaha.
Ia Talent Hunt-ko batanggipa 2011 bilsioni a·bachenge, bilsianti ong·atengon, ia 2024 bilsioba ong·atna gita cholko man·aha aro mikkangchiba apsandaken ong·atangkugen ine GHTDS-ni Padot Ahap N.Sangma aganaha.
Ia Talent Hunt Session 13-ko ong·atna gita Chief Minister Special Grant, West Garo Hills District Administration Tura, State Bank of India (SBI) Tura, Meghalaya Co-operative Apex Bank Ltd. Tura aro Meg India Bonded Hawakhana Tura bakrime dakchakanichi chu·sokatna gita man·aha ine Sangma aganaha.
Ia Talent Hunt Session 13-o git ring·susaani, chroksusaani aro Ethnic Beauty Contest-koba ong·atangaha. Una agreba git ring·rakgipa (Singer)-rang, Video Film tarigiparang, Youtuber-rang, Blogger-rang, Songbad-na Kobor Ra·timgipa (Reporter)-rang, Kal·susaanirango Medal man·giparang, HSSLC aro SSLC porikkarango nambatsrange pass ka·gipa chong·motan (Topper)-rangna, India A·chik Icon Award-rangko on·angaha.
Singing ba git ring·susanio chegiparangara Fridin A.Sangma skanggipa, Nokrike K.Sangma gnigipa aro Mataram B.Marak gittamgipa ong·e, boksisko man·angaha. Dancing ba chroksusaanio chegiparangara
Lonica Chimay skanggipa, Elezar M. Sangma gnigipa aro
Roster Koch gittamgipa ong·e, boksisko man·angskaha.
Beauty Contest-o chegiparangara
Nancy Vianey D Sangma skanggipa, Teroksa G Momin gnigipa aro
Agime K Sangma gittamgipa ong·e, boksisko man·angaha.
Indake Talent Hunt Session 13-ko chu·sokatna gita Garo Hills Talent Development Society-ni member-rang rakbee aro bimchipe kam ka·anichi ia Talent Hunt Session 13 chu·sokgipa ong·aha.
Ia nambegipa cholko chadamberangna on·na man·aniara, dal·dobaenggipa chadamberangni donuenggipa changa sapanirangko jinmana dakmesokna ba parakna man·ahani gimin, Talent Hunt Session 13-ni bon·kamgipa salo mongsonggipa sokgipa GHADC-ni Deputy CEM Nikman Ch.Marak aro Meghalaya Co-operative Apex Bank Tura-ni General Manager GHTDS-ni dilgiparangko aro bak ra·gipa sakanti chadamberangko mittele aganangaha.
