Tura, Aug 28,2024: Re·anggipa July 16 tarik pringwalni 2 bajimango Shillong-ni MBOSE guest house-o kam ka·gipa mandeko kragija dokanina matnangako man·ani ja·man, da·oba changsataie, Gambegre by-election-na campaign ka·engmiting somoio, manderangko salna gita baditaba sak manderangna skigipani kamrangko man·e on·aha ine a·kangtaiahani gimin Rangsakona-ni NPP MLA Subir Marak-ko Social Activist saksa Cherian Momin matnangattaiaha.
Cherian Momin-ni parakatani gitade, social media-rango watpripraenggipa video-oniko MLA-ni, baditaba sak manderangna skigipani kamko man·e on·aha ine a·kanganiko nikna man·aha.
“Uni kamrangko man·e on·ani gimin uko mittelpilna krae niknaba gnang, indiba name nigenchimode, ian uni mikkang niteani aro ku·mitdu ra·aniko mesokani ong·enga. Skanggipao uni kamara bil jak mesokaniko aro gnigipao kamrangko on·aniara daksrukaniko mesokani ong·aha” ine Cherian Momin parakataha.
Gambegre by-election-na campaign ka·engmiting somoio indake manderangna parakahani gimin matnangatengon, “Kamrangko on·na gita sawa una bilko on·aha? Seokako man·gipa MLA ong·e, uni iandake a·kanganiara an·tangni man·gnina uni bilko jakkalsretani ong·a” ineba Momin parakataha.
Rangsakona MLA-ni indake, kamrangko man·e on·a ine a·kanganiara kamna seokanio kakket ong·gijaniko aro donnue dakaniko mesokani ong·aha. “MLA-ni a·kangani gita ua kamrangkoa uni ma·sigiparangna ba politics-o bak donggiparangnasa on·ahama? Ian ong·bebegenchimode, lekka porako on·anio namgniko chanchiani donggijaniko mesokasan ong·aigija, iandakgipa kamrangna an·tangtangko tarienggipa chadamberangni ka·donganiko bon·atani gitaba ong·enga” ine Momin parakataha.
Momin-ni parakatani gitade, video-o Rangsakona-ni MLA Subir Marak, sak 25 manderangna skigipani kamko aro uni ja·mano gipin sak 28 manderangna kamrangko man·e on·aha ine a·kangaha.
Iani bidingo sandirokna gita dabichina ua pilak NGO-rangko aro Garo Hills-o songdongenggipa manderangkoba Momin didiataha.
