@ghdnews.in@

Tura, February 2, 2026: Batanggipa 2014 bilsio A·chik National Volunteers Council (ANVC) aro ANVC-B dolrang baksa a·dok aro ma·mong sorkarini songgigrikaniko aro 2025 bilsini September jao State Level Monitoring Committee (SLMC)-ni tom·anio tik ka·aniko Tura-ni MDC Bernard N Marak, a·dok sorkarina gisik ra·atpiltaianiko on·ataha.

Iani bidingo Meghalaya sorkarini Home Minister Prestone Tynsong-na sedoatengon, 2025 bilsini September 25 tariko, State Level Monitoring Committee-ni tom·aniko ong·atanio, jagniprakon tom·aniko ong·atna, Nodal Officer-rangko songna, sorkarini on·na tik ka·gipa Rehabilitation Package-rangko man·kugijagipa ANVC aro ANVC-B dolni manderangna dakchakanirangko on·na aro district committee-rangko songna tik ka·ahachim, indiba ia ku·rachakanirangko da·alonan sorkari, chu·sokate on·kujaenga ine Marak parakataha.

“Changni chang ku·rachakanirangko on·ani ja·manba, ANVC dolrang baksa songgigrikaniko chu·sokatchipgijaniara a·dok sorkarini gisik nanggijaniko mesokani ong·enga. Garorangni dingtang dingtang neng·nikanirangko namatchipna man·gija donaniara Garo Hills-o songdongenggipa manderangni neng·nikanirangko namatna a·dok sorkarini gisik nanggijaniko mesokani ong·enga” ine Marak, a·dokni Home Minister-na sedoatgipa chittio janapataha.

ISIS-K bobil dolni A·chikrangna ka·mikkenataniko nom·e ra·na man·jawa ine janapatenba, Garo Hills-o niam gri quarry-rangko chalaina on·ani a·selan gipin biaprangoni manderang napsrukbae ong·gija kamrangko ka·enga. Re·anggipa January 9 tariko Rajabala pulis station-ni ning·o A·chik chadambe saksa siaha ine Tura MDC janapatenba, ia a·sel ong·ani somoio silchidareni gam·anirangko knana man·aha, indiba ia obostako dongnuna jotton ka·aha. Ian Garo Hills-ni a·kawe jolrango silchidare ra·bitgipa manderangni jak donganiko mesokani ong·a ineba parakataha.

Ia a·selni bidingo name sandirokgenchimode, A·chikrangko ka·mikkenatanio ISIS-K bobil dol baksa jak donganiko ma·sinaba gnangchim. Indiba A·dok sorkarini sandirokna gisiko nangjahani a·selan gipin biapni manderang, Garo Hills-ona re·napbae, niam gri quarry-rangko chalaina man·enga aro maming licence gri dingtang dingtang bading chiwalanirangko dake cha·na man·engaha ine Marak parakataha.

A·kawe jolrango Tribal ong·gijagipa manderangna GHADC-ni a·a pattarangko niam gri on·ani a·selan ua jolrango songdongenggipa gipin jatrang, ua biaprangko an·tangtangni a·a ine a·kangtokenga ine janapatenba, “East Pakistan (Bangladesh)-ko bak dakani somoio katbranggipa manderang, Garo Hills-o songdongchengaha, indiba ua biaprangara Sixth Schedule-ni ning·osa ong·ani gimin a·arangko breani ba ra·ani niamrang dongjachim.

Indake ong·genchimoba, maming u·iatchengani gri bilsi 70-mangna skang Congress sorkari, Assam Land Regulation Act-ko ra·gataha aro katnape dongenggipa manderangna a·songni niam bidikko pe·e GHADC gita a·a pattarangko on·aha. Sixth Schedule a·jao indake niam gri dakaniko simsakjani a·sel Assam Schedule-ni ning·o donggipa a·arangko Assam-ona man·angpilgnok, ine Tura-ni MDC aro ANVC-B-ni gitcham Chairman Bernard Marak, jean 2014 bilsio a·dok aro ma·mong sorkari baksa songgigrikanio soi ka·achim, ua parakataha.

Re·anggipa 2025 bilsini September jao State Level Monitoring Committee-ni tik ka·gimin gita, ta·raken State Level Review Meeting-ko ong·atchina, Nodal Officer-rangko songchina, Tribal manderangko chel·chakna Sixth Schedule-ni ning·o dongimin niamrangko raken ja·rikchina aro District Level Committee Membor-rangko ra·chakchina Marak didiataha.