@ghdnews.in@

Ampati, February 3, 2026: Adita salrangna skang, West Garo Hills a·jani Rajabala Pulis station-ni ning·o donggipa Goalgaon songo, ACHIK NGO-ni member saksako so·otani ja·man, Garo Hills-o so·sojengjeng ong·engani a·sel gue badinggipa manderang aro game ge·e cha·enggipa manderang nangchakeaniko man·engani gimin Sombar salo, South West Garo Hills a·jani District Administration, tom·tomaniko rakkiangna gita Ampati-o jinma tom·aniko ong·atangaha.

Ia tom·bimonganio, Nokma Council-ni member-rang, dingtang dingtang toromni dilgiparang, NGO-rang, bajar committee-rang, gue badinggiparang aro gipinrang bak ra·angtokaha.

Ia tom·anio dingtang dingtang dilgiparang, jinmana aganprakengon, so·sojengjeng ong·enganichi gue bagan dake cha·enggipa manderangni neng·nikanirangko janapangenba, jatgnini gisepo tom·tome aro meli-nangrime dongna nangani gimin janapangtokaha.

Goalgaon songo ong·anggipa obostani a·sel Garo Hills gimikon so·sojengjeng ong·na nangengahani gimin ia obostako raken jegalangtokaha aro tom·tomaniko ra·bapilchina didiangtokaha.

Ia tom·anio, South West Garo Hills a·jani Deputy Commissioner Anendya Raajsshre, jinmana aganprakengon, South West Garo Hills a·jao chengonin dingtang dingtang jat aro toromni manderang, ku·cholsan nangrime songdongbaenga, uni gimin mikkangchiba apsan meli-nangrime janggi tangangchina aro tom·tomaniko rakkiangchina didiangaha. Niamrangko skatang jako ra·jachina aro pangnan District Administration baksa bakrimchina, ua dingtang dingtang dolrangko aro a·jao songdongenggipa manderangko didiangaha.

West Garo Hills a·ja aro Assam-ni South Salmara a·ja baksa pangkamgipa tom·tomaniko ra·bana kamko ka·enga ine tom·anio District Administration-ni official-rang parakatenba, iandakgipa somoirango chakchike tom·tomaniko rakkiangchina didiangaha.

Ia tom·anio, SWGH a·jani SP Vikash Varma-ba jinmana aganprakengon, dingtang dingtang jatrangko tom·tome dongchina, social media-rango gipenggipa kattarangko kakket ong·ama ong·ja name sandichengchina aro banoba maiba a·selrang ong·genchimoba, niamko jaktango ra·gija ta·raken sepangbatgipa pulis station-na kobor on·china, a·jao songdongenggipa pilak manderangkon didiangaha.