@ghdnews.in@

Gasuapara, Feb 16, 2026: India a·songni jakgitel ong·ani da·o bilsi 78 gapahaoba, South Garo Hills, a·jani Chokpot Block-ni ning·o ga·akgipa Damet Rongsina songo da·onaba bijoli gri ong·e dongna gita nangenga, ine parakataha.

Songnokgipa manderangni aganani gitade, uamangni songona ru·uta bilsirangna skangan kangal cholgrirangna ma·mong sorkarini on·gipa BPL Scheme-ni bijoli silitingrangko nokantina sringe on·na gita sanction sokahani gimin bijoli krongrangko songahachim. Indiba maini gimin matchotgija dontongaha, MePDCL Department-ni gita maming agantalanirangko on·gija galchipe donaha.

Iani gimin songni manderang sing·sandianiko dakna gitaba kangal cholgrirang ong·e, pa·sokjaha aro sena jotna gitaba neng·nikanirangko man·e, ru·uta bilsirangna dakchaka gri dongaha. Bijoli dongjani a·sel songni manderang songo namen neng·nikaniko man·enga. Songo noko kenna sin·anirang sokbagenchimoba, maming teng·atani dongjae, songni manderangna kenchakanirang ong·a aro mongsongbate poraigipa bi·sarang bijoli gri andal-mindik skie ra·anirango, porikkarangna poraianio namen neng·nikanirangko on·enga, ineba songni manderang parakataha.

Unbaksana ku·silitingrangko jakalanio bijoli dongjae, namen neng·nikaniko man·enga, ine janapatenba,
India a·song, a·gilsak gimikko top-3 Digital Economy-ni gadangona sokpilgenchimoba, Meghalaya a·dokni South Garo Hills a·jani mitam bakrango da·alonaba, bijoli gri janggi tangna nanganiara, bimingna Digital India, indiba kamde chu·sokgijaniko parakskaaenga, ineba parakataha.

India a·songni dal·dalgipa a·dokni bakrango bijoli man·na nangani gimin, High Court-rango bang·en dakgrikaha, jedake, “Shri. Maiki Jain vs BSES Rajdhani Power Ltd. aro Ors 2025 (Delhi High Court), Shri. Manishi Maity vs West Bengal State Electricity Distribution Company Ltd. 2012 (Calcutta High Court) aro Jaishree Begga vs State of Punjab & Ors 2025 (Punjab High Court).
Uandake, dingtang dingtang India a·songni High Court-rango rai on·ani gitade bijoliara, ia chasongode, mandeni janggi tanganio man·na nangchongmotgipa mingsa bil ba right ong·achim. High Court-rangni rai on·ani gita, Bijoliara Fundamental Rights-ni Article-21 “Right to Live ba Janggi tangna bil dongani” bako ga·aka, maina ia chasongo pilak nanganirangnan bijolini bilchisa kamrangko ka·na gita man·a.

Uni gimin ia neng·nikani bidingo ta·rake nirokatchina, “Anga a·dokni Power Minister Metbah Lyngdoh-na chitti sedoataha. Mai neng·nikanirangko man·e, kamrangko dontongahachim, uarangni bidingo tale ma·sina gita Chokpot MePDCL Department-o RTI ka·aha” ine .
Clinton R. Marak parakataha.