Resubelpara, Sept 4, 2024: North Garo Hills a·jani Kharkutta Constituency-o donggipa A·dokgre C&RD Block-ni ning·o ga·akgipa Dobanggal Non Govt. LP Skul nok namsrangjani gimin poraienggipa bi·sarang namen neng·nikaniko man·enga ine jolni manderang koborna u·iataha.

Ia LP Skulko 1994 bilsio a·bachengatahachim, indiba da·alona kingking department-ni gitaba maming nirok sandianiko dakjahani a·sel, Skul nokni pakmarang nosto ong·aha aro nokkingni tinrang binekaha. Ia Skulo poraienggipa bi·sarang sak 40 mang dongachim. Wachini somoio skigiparang aro poraienggipa bi·sarang skul ka·na man·jae, bang·a neng·nikaniko man·enga aro bi·sarangna dal·bea gimaani ong·enga ine songni manderang suk ong·gijaniko parakataha.

Ia skul nokko taridapna gita darangba dakchakaniko on·jaha. A·doko sorkari poraiani gadangko namdapatna, skanggipa kamko ka·gen aro bang·bate tangka paisarangko on·gen ine ku·rachakahachim. Indiba ia Dobanggal Non Govt. LP skulkode nirokata dongja. A·dok sorkari aro department nirok simsakjani a·sel, Dobanggal LP skulsan ong·aigija, Garo Hills-ni bang·bata songrangon, Non Govt, Govt. LP aro SSA skulrang galchipako man·enga. Iarangko niroke namdapatna sorkari aro department-ni daito ong·achim ineba parakataha.

Bang·bata ning·tugipa songrangon kangal cholgri nokdangni bi·sarang namnamgipa private skulrango poraipana chol man·jae, Non Govt, Govt. LP aro SSA skulrangosa poraitokenga. Indiba songni skul nokrang namjani a·sel name poraina man·jae, bang·a bi·sarangan Skul poraigija dontongna nangtokenga. Uni gimin, a·dok sorkari aro department, Dobanggal Non Govt.LP Skulko ta·rake nirokatenba, Skul nokko taridape on·pachina jolni manderang mol·molataha.