By:ghdnews.in (Garo Digital News)

Tura, March 10, 2026: Garo Hills Autonomous District Council (GHADC) election-o susana gita Scheduled Tribe (ST) Certificate-ko nangtelgipa ong·atna, Executive Committee (EC)-ni niam ra·gataniko ra·chakchina, gita Garo Hills-o songsalna dangdike on·enggipa saksa, Meghalaya a·dokni Governor CH Vijayashankar-na sedoataha.

A·dokni Governor-na sedoatengon, Indian Constitution-ni Sixth Schedule-ara, Tribal jatrangni bilrangko, songko nokko chalaiani bewalrangko aro jatni daka rikanirangko chel·chakna on·gimin, niam ong·ani gimin District Council election-o susana gita ST Certificate-ko nangtelataniara niam baksa apsan ong·enga ine Greneth M.Sangma parakataha.

District Council election-rango Tribal ong·gijagipa candidate-rangko susana on·aniara, Indian Constitution-ni Sixth Schedule-o on·gimin niam retiko aro bilrangko pe·ani ong·a ineba Sangma parakataha.

Sixth Schedule-ni ning·o District Council-rang, tribal manderangni gam-jinko man·rikani, bia ka·ani aro jatni daka rikani niamrangko ra·gatna bil donga ine janapatenba, ia niamrango A·chikrangni daka rikanirangko ripingna gitade, dilgiparang jattangonin ong·na nanggen ine Sangma parakataha.

Sixth Schedule-ni niamo tribal jatrangko chel·chakna nangani gimin, GHADC-ara A·chikrangni daka rikani, a·a-chia aro niam retirangko chel·chakanio mongsonggipa ong·a ineba Sangma parakataha.