Baghmara, May 28,2025: South Garo Hills a·jani Darit-Betegre songo Aadhar card-rang dongtokjani gimin manderangni Job Card-rangko dontongatani ja·man, Gasuapara Block Development Officer-ni kosako Social Activist Greneth Sangma, South Garo Hills-ni Deputy Commissioner-na badi ka·doangaha.
Greneth Sangma-ni parakatani gitade, Gasuapara BDO-ni kosako South Garo Hills a·jani Deputy Commissioner-na badi ka·doanganio, ma·mong sorkarini dingtang dingtang Scheme-rangko ra·na gita Aadhar-ko nangtelgen ong·ja, ine Supreme Court, raiko on·manahachim aro Meghalaya a·dokkoba Aadhar Act-ni niamrangoniko watahani gimin, manderangna nangtelgipa ong·jachim.
Ma·mong Sorkarini iandakgipa, Scheme-rangna a·dok sorkari department-rang, dingtang cholrangko ra·gatskana nanga, ineba Sangma parakataha.
Uni gimin, ia kamko ta·raken nirokatchina Deputy Commissioner-ko didiatenba, songni manderang kam ka·e cha·pana man·na gita Job Card-rangko on·pilchina aro Aadhar-ko nangatgija pilak namgnirangkon songni manderangna on·china, Job Card donggiparangna uamangni man·gnirangko ta·raken on·china Social Activist didiataha.
