Tura, May 5, 2025: A·dokni Skotong Minister Conrad K.Sangma Sombar salo Meghalaya Health Advancement Policy-ni bak gita Tura Holy Cross Hospital aro Tura Christian Hospital-na tangka gong kror-prakni cheque-rangko pakwate on·angaha.

Sangma hospital-rango sanna bananirangko nambatatna miksonge ua tangkarangko Tura-ni private hospital-rangna pakwate on·angaha.

Tangkani cheque-rangko pakwate on·na gita Tura Mission Compound-o donggipa Working Women’s Hostel-o tom·aniko ong·ate, a·dokni Skotong Minister, private hospital-rangko chalaienggipa doctor-rang baksa agangrikangengon, sanna bananio manderangna gisiko nangbee dangdike on·engani gimin mittelpilangenba, uamangna dakchakanirangko on·na man·ahani gimin, Sangma an·tangni kusi ong·aniko parakangaha.