@ghdnews.in@

Tura, Jan 9, 2026:Meghalaya a·dokni Unarmed Branch (UB)-na sak 76 gital seokako man·gipa Pulis Sub-Inspector-rangna a·dokni Skotong Minister Conrad K.Sangma da·al January 9 tariko Appointment Letter-rangko 2nd MLP Battalion, Goeragre field-o suale on·angaha. Ia sak 76 gital Pulis Sub-Inspector-rangko rimnapna man·ahani gimin, Skotong Minister kusi ong·bean baksa nama ku·pattianirangko on·angaha.

Ia gital seokako man·gipa Pulis Officer-rangna agan-ku·pattiangengon, a·dok sorkarini pangchakna man·gipa, “Nachil aro Mikron”-ara Pulis Sub-Inspector-rangan ong·a ine Skotong Minister aganangenba, uamangan a·songni niamko ja·rike a·doko tom·tomaniko rakkina nanggiparangko u·igipa aro sasonni bewalrangko nambatatna kam ka·giparang aro niamko ripinggiparang ong·a ine Sangma parakangaha.

Kam ka·anirango pulisrang bang·a neng·nikanirangko chagrongna nanggenchimoba, da·o rimnapa man·gipa officer-rang mikkangchi bimchipe aro gisiko nange kamrangko ka·angchina Skotong Minister didiangaha.

Uandake ia kamrangna rimnapanio darangkoba mikkang niteani gri pilakkon apsan gadangon baseaha, ineba Sangma aganaha.

Ru·utgija sal somoirangni gisepon, gital rimnapako man·gipa Sub Inspector-rangna skies on·aniko dakgen, uni gimin pilakan training-o bimchipe aro an·tangtangko on·kange bak ra·angchina didiangenba, ian uamangni mikkangchi kam ka·na changa sapanina dakchakani ong·gen ineba Skotong Minister ku·pattiangaha.

Ia kamna seokanio maming dakgualni gri kam ka·aha, jeon sak 21,007 kamna galgiparangoni sak 9,507 Physical Efficiency Test (PET)-o bak ra·aha aro porikka seanio sak 1,970-ko seokaha. Bon·kame sak 76 candidate-rangkosan ia kamna seokaha ine Director General of Pulis (DGP) Idashisha Nongrang aganangskaha.

Uandake ia chango seoka man·gipa candidate-rang lekka poraiani gadangoba namgiparang ong·a aro bang·batan Technical Qualification donggiparang ong·a, jeon 23% percent Post Graduate Degree, donggiparang ong·a ineba Nongrang agandapangaha.

Ia program-ko ong·atanio bang·a Senior Official-rang aro dilgiparang, jekai Border Areas Development (BAD)-ni Minister Brening A. Sangma, a·dokni Chief Secretary Dr. Shakil P. Ahammed, West Garo Hills a·jani Deputy Commissioner Vibhor Agarwal, Senior Superintendent of Pulis (TAP) Rituraj Ravi, West Garo Hills-ni Superintendent of Pulis (SP) Abraham T. Sangma baksana gipin senior pulis officer-rang aro Civil Administration-ni officer-rang bak ra·angtokaha.