Ampati, Oct 3, 2024:South West Garo Hills a·jani Rerapara block-ni ning·o donggipa Damalgre Power Sub Station 33/11KV, 2X2.5MVA-ko a·dokni Skotong Minister Conrad K.Sangma, Power Minister AT Mondal aro Rangsakona-ni MLA Subir M.Marak baksa Bristibar salo nokdonggae ba oprake on·angaha.
Ia Damalgre Power Sub-Station-ko rikna gita Asian Development Bank (ADB) gong kror 6.19 tangkarangko on·ataha, ia sub station-ko rikanichi Damalgre aro uni wilwilao donggipa bang·a songrang maming neng·nika bijoliko name jakkalna man·gnok.
Skotong Minister tom·anio jinmana aganprakangengon, da·ode Rerapara Damalgre Power Sub Station-ko a·bachengatahani gimin, jolni manderang nanga gita bijoliko jakkalna man·gnok aro bijolina neng·nikanirang komianggnok ine aganangaha.
Unbaksana ia sub-station-ko a·bachengate ba oprake on·na man·anichi pilak tangka paisani kamrang, game cha·giparang aro producer grouprangko ka·dongatani mingsa namgipa cholba ong·gnok, aro kam gri dongenggipa jolni bang·a chadamberang an·tangtangni changa sapanirangko jakkale, kamrangko a·bachengatna, tangka paisarangko kamaina gita namgipa chol ong·gnok ineba Sangma agandapangaha.
