Tura, Jan 15,2015: West Garo Hills a·jani dingtang dingtang Higher Secondary Skulrango poraienggipa chatro chatrirangna, a·dokni Skotong Minister Conrad K Sangma, Monggolbar salo Mobile Tablet (M-Tab)-rangko, Tura District Auditorium-o suale on·angaha.

Ia program-ko ong·atanio, a·dokni Skotong Minister baksa Meghalaya Legislative Assembly-ni Speaker Thomas A Sangma-ba dongpae, chatro chatrirangna M-Tab-rangko suale on·angpaaha.

Ia M-Tab-rangara, Chief Minister’s Student Digital Learning Scheme-ni ning·o chatro chatrirangna suale on·enggipa ong·a aro ia Tablet-rango, Higher Secondary Skulo poraienggipa chatro chatrirangni porikkana gitcham question paper-rang, mock question paper-rang aro dingtang dingtang porikkana aganchakgimin answer paper-rangko donaha.

Indake ia M-Tablet-rango, audio-video, animation aro 3D graphic-rangkoba chatro chatrirangna donaha. Batanggipa 2021 bilsioni gimik lak 1-mangni gita tablet-rangko Class XI-ni chatro chatrirangna suale on·aha aro 2023-24 bilsioba ia Scheme-oniko a·dokni sak 30,480 chatro chatrirang namgnirangko man·aha.

West Garo Hills a·jao ge 3000-mang M-Tab-rangko suale on·anggen aro Monggolbar salo ge 21 Higher Secondary Skul-rangoni sak 400-na baten chatro chatrirang, tablet-rangko man·aha aro
dingtang dingtang Higher Secondary Skulrango skigiparang sak 5,700-mangni gita tablet-rangko man·gen ine parakangaha.

Ia M-Tab-rangko chatro chatrirangna suale on·ani salo a·dokni Skotong Minister, jinmana aganprakangengon, ia M-Tab-rangara, dingtang dingtang porikkarangko sena gita chatro chatrirangko tarisamsona tarigimin tablet-rang ong·a aro ian chatro chatrirangni skie ra·anio altubatatgipa on·gen ine parakataha.

Ia program-ara chatro chatrirangna indakgipa ostrorangko suale on·na gita ong·atgipa program-san ong·aija, indiba mikkangchi a·dokna ka·donganiko mesokanisa ong·enga ine Skotong Minister aganangaha.

Technology-ara mandeni janggi tanganio pilakni gitan dingtanganiko ra·baenga, ia Tablet-rangko on·aniara sorkarini chatro chatrirangna simsakaniko mesokanisa ong·enga ine Skotong Minister agandapangaha.

Shillong IT Park chu·sokani gimin janapangengon, ia sal somoirango a·dokni chadamberangba US aro Europe a·songrango AI Company-rangna kam ka·engaha ine Skotong Minister parakangaha.

Smart Classroom-rangko aro digital-ko jakkale skie ra·aninichi chatro chatrirangna bang·en dakchakanirangko on·na man·a, technology-de skie ra·aniko altubatatna dakchakani ong·a ine Skotong Minister, ia ostrorangko name jakkalchina chatro chatrirangko didiangaha.