Tura, Oct 11,2024: Re·anggipa antini October 4 tarikoni mikkarang jimbee waanichi Garo Hills-ni dingtang dingtang biaprango a·arang rudale, chirang bananichi nosto ong·gipa West, South aro South West Garo Hills, a·jani Chokpot, Dimapara, Gasuapara Dalu aro Makalgonchu songrangona a·dokni Skotong Minister Pa Conrad K.Sangma re·roroe niangaha, indake Bristibar walo Anggallanggre songoni Tallang chibimako kabatgipa dollong be·ako niangjolaha.

South Garo Hills a·jani Chokpot jolrango bang·a biaprangon, chirang bane rama jal·langrang, skulrang, hospital-rang aro manderangni nokjamrang, bagan barirang, mi a·palrang bang·en nosto ong·ako man·aha.

Mikkarang dontonggija wae chirang bananichi Chokpot-ni Mount Carmel Skul bang·en nosto ong·ako man·ahani gimin, ua skulna dakchakaniko on·china sorkariko mol·molahani gimin Butbar salo Skotong Minister re·ange nieaha. Indake ua skulna pilak nanganirangko dakchakaniko on·na ku·rachake donbaaha.

Apsandaken, Reni Badimagre songoni Bibragre-ona kabatgipa dollong chi banani a·sel nosto ong·ahani gimin, ua dollongko ta·raken taripilchina Skotong Minister, PWD Official-rangko ge·etangaha.

Mikkarang jimbee waanichi a·arang be·dape chirang bananichi neng·nikaniko man·enggipa manderangna a·dok sorkari dakchakanirangko on·gen, ine dingtang dingtang songrangona re·ange songni manderangko grongmitting somoio Skotong Minister ku·rachakbaaha.

Re·anggipa Monggolbar saloba Skotong Minister Dalu aro Gasuapara jolrango a·a be·dapako man·gipa nokdangrangona re·ange duko ga·akenggipa manderangko grongeaha aro sianggipa nokdango dongrikenggipa manderangna gong lak 4-ni ex-gratia ba tangka paisarangko on·angaha.

Uandake, Bristibar attamo Skotong Minister, South West Garo Hills a·jani Purakhasia jolrango chi bananichi neng·nikanirangko man·enggipa A·kinpara, Posenggagre aro Makalgonchu songrangona re·ange manderangko grongani ja·mao Anggallanggre songni Tallang chibimako ga·bate dollong be·ako niangaha aro ta·raken ua dollongkoba taripile on·na gita ku·rachakangaha.