Tura, Oct 21, 2024:A·dokni Skotong Minister Pa Conrad K.Sangma, Robibar attamo Gambegre constituency-ni ning·o donggipa Sanjengpara, Mebitpara aro gipin songrangona re·ange, NPP candidate Dr. Mehtab Chandee A.Sangma-na campaign ka·angaha.

Gambegre by-election-ara Gambegre jolni manderangko ku·cholsan ong·ate sorkariko chalaienggipa NPP party baksa bakrimna namgipa chol aro gamchatgipa election ong·a. Songni manderang ku·cholsan bakrimanichisa Gambegre constituency-o dingtang dingtang namroro silroroani kamrangko ra·bana man·gen ine ua aganangaha.

Re·baenggipa November 13 tariko ong·atenggipa Gambegre by-election-o NPP candidate Dr. Mehtab Chandee Sangma-ko cheatna, NPP-ni National President aro a·dokni Skotong Minister, rakbee kamrangko ka·enba, Gambegre constituency-ni ning·o donggipa dingtang dingtang songrangona re·ange manderangko grongna gita cholko man·ahani gimin, Pa Sangma kusi ong·aniko parakangaha.

Gambegre Constituency-ni dingtang dingtang songrango donggipa manderang baksa campaign-ni somoio gronge agangrikna cholko man·ahani gimin, “Anga namen kusi ong·a aro ia jolrango dakna nanganirang bang·en dongengkua aro ian chingni manderangna on·kange kam ka·ani ong·a. Ra·bianirang bang·en donga, indiba Gambegre jolna namroro silroroanirangko ra·baanio an·ching chu·sokgipa ong·chongmotgen” ine Pa Sangma songni manderangna ka·dongatani kattarangkoba aganangjolaha.