@ghdnews.in@

SHILLONG, FEB 7, 2026: Ia 2026-2027 bilsini State Budget-na Sukrobar salo, a·dokni Skotong Minister Conrad K Sangma, dingtangmancha Ward’s Lake-o tom·aniko ong·ate chanchirimaniko dakdilangaha.

Ia tom·anio, skigiparang, chatro chatrirang, songsalna kam ka·enggipa dolrang, game ge·e cha·enggipa dolrang, sorkari official-rang, songbad segiparang ba journalist-rang aro dingtang dingtang gadangni manderang baksa a·dokni budget-ko tariani bidingo Skotong Minister chanchirimaha aro uamangni sing·anirangna agan-talatanirangko on·angaha.

Ia chanchirimanirangko dingtang dingtang department-rang, knatime aro see ra·angtokaha.

Ia tom·anio a·dokni Skotong Minister, jinma baksa chanchirimengon, batanggimin bilsi 8-ni gisepo a·doko chu·sokatgimin dingtang dingtang kamrangko mesoke on·angenba, Meghalaya a·dokba GSDP-o a·songo ta·rakbatsrange dal·roroenggipa a·dok ong·enga aro Tamil Nadu-ni ja·man gnigipa ong·enga ine parakangaha.

Batanggipa 2022 bilsioni a·bachenge, 2032 bilsini gisepo a·dokni Economy-ko changgittam bariatna niksamsoenga, maina dingtang dingtang mongsonggipa kamrangko tang·doatna sorkarini nisan done kam ka·enggipa, Mission 10-ni bidingo Skotong Minister talate on·angaha.

A·dokni pilak manderangna budget-ko namgni ong·atna man·na gita an·tangtangni u·i-ma·sianirangko megh.finead@gmail.com website-o ba CM Connect Helpline nomber-ona u·iatchina gitaba Skotong Minister, a·dokni manderangko didiangaha.