@ghdnews.in@

Tura, Jan 13, 2026: Association for Democracy and Empowerment (ADE) Apex Committee, HQ Tura, re·anggipa January 9 tariko West Garo Hills a·jani Rajabala, Goalgaon jolo dolsa manderang, ACHIK Organisation-ni member-rangko chadrapanio chadambe saksako jinma dokgrime siataniara, ra·chakna man·gijani aro uamangni kosako raka sinjetaniko on·na krachongmota. Uandake namgijagipa manderangni gisiko mandeskani janggina ka·saninggijaniko mesokani ong·a. A·chik a·songo jakgitel ong·e saksa sakgipin baksa ku·mong nangrime donganio aro niam retirangko rakkianio ian kengniko ra·baani ong·a ine jegalataha.

ADE HQ Tura, ua obosta ong·anio jinmani naljokanina, ka·o nanggipa dolrangni so·sojengjeng ong·atanina aro niam retirangko rakkianio jajrenganiko ra·bagipa ine janapataha. Bebe gita kakket bichalko ra·bana ru·utatgenchimode, ian so·sojengjeng ong·atanina didianiko on·a baksana sorkario manderangni ka·donganiko komiatgen ineba ADE mikrakataniko on·ataha.

ADE, duko ga·akgipa nokdangni manderangna kal·impaaniko on·atengon, a·dok sorkariko mandeni janggina aro tangrikenggipa nokdangni manderangna gisikni gita saknaaniko on·ahanina, ka·sae on·pilskaaniko ta·rake on·china didiataha.

Pulisrang darangkoba mikkang niteanigri aro somoi gita am·sandianiko dake, dos dakgiparangko rim·china aro ua a·sel ong·anio jak donggipa manderangni kosako rakbatgipa sastirangko on·china aro mikkangchi iandakgipa a·selrang ong·taijana gita kamrangko ka·china ADE dabiangaha.

Uni gisepon, iandake misilbegipa obostarangko champengsona man·na gita a·dok sorkari pangkamgipa champengsoani cholrangko ra·gatchina, ADE Apex Committee HQ-ni Additional General Secretary, Fremiush D Sangma didianiko on·ataha.