@ghdnews.in@

Shillong, Feb 20, 2026: Bristibar attamo, Shillong-ni Lok Sabha MP aro Voice of the People’s Party (VPP)-ni dilgipa Ricky A.J Syngkon, robol kal·e roengmiting somoio rang·gitik a·ao ga·akahani gimin uko bakan Shillong-o donggipa Dr H Gordon Roberts Hospital-ona ra·angahachim, indiba rasong gribee ua a·gilsakko watangaha. Ua bilsi 54 ong·ahachim.

Koborni gitade, Ricky Syngkon, an·tangni ripengskarang baksa Mawlai Mawiong kal·chakramo robol kal·e roengmitting somoio rang·san ua ka·tongni saaniko man·e a·ao ga·akgropaha.

Ga·aka bakan Syngkon-ko uni ripengrang, Jaiaw-o donggipa Dr H Gordon Roberts Hospital-ona ra·angaha aro doctor-rang, uko sanna gita jotton ka·beahachim. Indiba ua rasong gribee Bristibar walni 8:42 bajimango a·gilsakko watangaha.

Shillong-ni MP rang·gitik siangani koborko man·soani bakan VPP President Ardent M Basaiawmoit, Mawhati-ni MLA Charles Marngar, dingtang dingtang dolni dilgiparang aro East Khasi Hills District Administration-ni official-rangba hospital-ona re·angaha.

Mandeni janggina sal somoi dongja, basako mai ong·gen darangba agansona man·ja. Da·alo uni a·gilsakko wate re·anganichi nokdangni manderangna, ma·drang maharina, ripengskarangna, party-ni dilgiparangna aro a·dokna dal·bea gimaan baksa kalimani ong·aha.