www.ghdnews.in

Tura, Feb 22, 2026: Shillong Headquarter-ni Grassroot Organisation aro Tura Grassroot Organisation bakrime, Tura Balading-o donggipa Nokma Council Conference Hall-o salsani workshop-ko ong·atangaha.

Ia workshop-ko ong·atani miksongara, Nokmarangna Sixth Schedule-ni bidingo skie ba talate on·na gita, “Indigenous People’s Rights” ine Miksonganiko Done, Nokmarangna skie on·na gita Shillong Headquarter Grassroot Organisation-ni dakchakani ong·atna man·aha, ine Tura Grassroot Organisation-ni Padot Dr. Merril N.Sangma aganaha.

Ia salsani workshop-ona Arts & Culture-ni gitcham Director Ma CT.Sangma mongsonggipa sokgipa ong·e bakko ra·angaha aro unbaksana Shillong Headquarter, Grassroot Organisation-ni dilgipa Kennyson Lyngdoh, Resource Person-rang Pa Roger Benny A.Sangma aro Pa Disem D.Shira re·bae, Sixth Schedule, gamchataniko Nokmarangn skie ba talate on·angaha.

Dr Merril N.Sangma gimaangenggipa A·chik jatni niam-retirang, jatni dakbewalrangko maikai mikkangchi name ripingangna man·gen aro Nokmarang maikai an·tangtangni bilko jakkale a·dok chigako name ripingangna man·gen, ia miksonganio Nokmarangna skie on·na gita, ‘One Day Workshop’ ba salsani workshop-ko ong·atenga ine aganaha.

Ia workshop-ona Tura-ni Senior Citizen-rang re·bae bak ra·angan baksana, bang·a dingtang dingtang songni Nokmarang, mongsongbate Dadenggre jolni Nokmarang re·baenba skie ra·angtokaha.

Ma CT Sangma mongsonggipa sokgipa ong·e, jinmana aganangengon, skango A·chik a·song maidake ong·baachim, badia a·songoni re·bae, Garo Hills-o songdongchengaha. Garo Hills Autonomous District Council (GHADC)-ko mai bilsio man·aha aro District Council-ara maina gamchatachim, talatangaha. Skangode A·chik a·song namen apbalachim, indiba da·ode A·chik a·song jakchomsasan ong·aiaha. Bang·bata A·chikrangni a·dok chigarangan mitam Bangladesh a·songo, mitamko Assam a·doko aro adita bakrang Khasi Hills-o chapatako man·aha. Iarang gimikan skango dilgiparang simsakjani a·sel ong·aha ineba ua aganangaha.

Tura-ni Senior Citizen saksa Pa David Ch.Marak-ba workshop-o dongpae, jinmana aganangangengon, A·chikrangde skangonin me·chikko nokna donani gimin, gimagijagipa jat ong·a. A·chikrang me·chikkosa Nokma songa, uandake me·chikrang niamo pangchake, nokdangko nirok simsakgipa ong·a. Pagiparang nokdangko aldu mitangna kam ka·skaa, indaken me·chik aro me·asa apsangrik bilko jakkalna man·a. Gipin jatrang A·chik jat gita chasongni chasongna baikamgipa ong·ja. A·chikrang Sixth Schedule-o on·gimin bilo pangchake, jatni niam reti aro dakbewal rikbewalrangko ripingna aro an·tangtangchin sason ka·na gita dingtangmancha District Council-ko on·aha. Uano pangchake A·chikrang chasongni chasongna jatni dakbewalko ripingenga, uni giminsa District Council, A·chik jatna namen gamchatgipa ong·a, ine Pa Marak talatangaha.

Unbaksana, workshop-ona sokbagipa Resource Person-rangba, District Council-ni ning·o on·gipa Sixth Schedule maina gimchata, uni bilko maidake jakkalna nanga aro Nokmarangni bilara maiko dakna man·achim, Pa Roger Benny A.Sangma aro Pa Disem D.Shira, tom·bagipa songni Nokmarangna skie on·angskaha.

Ian skanggipa changna Tura-o workshop-ko ong·atchengaha. Iani ja·mano Garo Hills-ni dingtang dingtang songrango workshop-rangko ong·ate, Nokmarangna Sixth Schedule-ni gimin skie on·anggen. Maina bang·bata Nokmarangan, Sixth Schedule-ni niamrangko ma·sitokkuja aro an·tangtangni bilko jakkalna changkuja. Uni giminsa chinga Nokmarangna dingtangmancha skie on·na miksonganio ia workshop-ko ong·atenga ine Dr. Merril N.Sangma aganaha.