Shillong, May 14, 2025: Meghalaya a·dokni dingtang dingtang Self Help Group (SHG)-rangni sak 30 me·chik member-rang, Meghalaya State Rural Livelihoods Society (MSRLS)-ni official-rang baksa Monggolbar salo India a·songni Vice President Jagdeep Dhankar-ko, New Delhi-o grongeaha. Ua SHG member-rangko a·dokni Skotong Minister Conrad K Sangma dilangaha.
SHG-ni member-rangni Vice President-ko grongeanio a·dokni Skotong Minister baksa dongpagipa MSRLS-ni official-rangara, C&RD-ni Additional Secretary aro MSRLS-ni CEO Ramakrishna Chitturi, MSRLS-ni Chief Operating Officer Ronald Kynta, Cluster Level Federation (CLF)-ni Project Manager Heman Hillary Engleng Masharing aro West Garo Hills MSRLS-ni District Mission Manager Michelle Ch Momin ong·achim.
Vive President Meghalaya a·dokni SHG member-rangko gronge agangrikengon, a·doko Skotong Minister Conrad K Sangma-ni dilanichi, me·chik dolrangko bilakbatatna aro a·doko me·chikrangni changa sapanirangko jakkalengani gimin a·songni Vice President mittele aganaha.
Meghalaya a·doko me·chikrangko mangrakbatatani, an·seng baljokaniko on·ani aro ma·giparangna simsak nirokanirangko on·aniara me·chikrangni SHG-ko dal·roroatani ong·a ineba Vice President aganaha.
New Delhi-ona re·anganio sak 30 SHG-ni member-rang, Prime Minister-ni Museum-koba nianggen.
Batanggimin bilsi 10-ni gisepo, songadam nokadamrango SHG-rangko bikotanichi aro dingtang dingtang kamrangchi me·chikrangni bak ra·anirang namen tang·dobataha, maina 2015 bilsio dol 5000 SHG-mangsan dongaiachim, indiba da·ode dol 52,000 SHG-rang dongaha. SHG Mission-ni ning·o da·o lak 5.2 me·chikrangko man·chapengaha ine Skotong Minister aganaha.
Mongolbar salo a·songni Vice President-ko grongegipa dingtang dingtang SHG-ni member-rangara, East Garo Hills-ni Agnesh Momin, Zerina R Sangma, Gonitha R Marak, North Garo Hills-ni Tangchi Sangma, Sonabal Sangma, Tinamuni R Marak, Cheryan Topsy R Sangma, Balse R Marak, Bethsidha D. Sangma, South Garo Hills-ni Amritha Marak, Novina Ch. Sangma, South West Khasi Hills-ni Lahun Mary Blah, East Khasi Hills-ni Letizia Lyngdoh Mawphlang, Joycy Mary Wankhar, Eastern Khasi Hills-ni Pdianghun L. Nonglait, Behappy L Nonglait, Lucia Wahlang, Carolyne Ryntathiang, Ri Bhoi-ni Regina Dkhar, West Jaintia Hills, Mardorlyne Pariong, Markordor Nongrem, West Khasi Hills-ni Arjulish Ch. Sangma, South Garo Hills-ni Aitilin Marbaniang, Ri Bhoi-ni Josephine Lyngdoh, Mary Ann Diengdoh, East Jaintia Hills-ni Santi Shylla, Merry June Ymbon, Baiasngewlem Lamare, West Jaintia Hills-ni Waiting Syrti aro East Khasi Hills-ni Pynshnalad Suting ong·a.
