www.ghdnews.in#

Tura, Feb 21, 2026::Daldagre Captain bagano donggipa Tura Sherwood Skulo skigipa saksa Biswanath Patro, jean Lower Babupara-ni Embee Rosebud Skul sepango dongachim, uni kosako Neetu N Marak Araimile Pulis Station-o badi ka·doangaha. Marak-ni badi ka·anio janapatani gitade, ua skigipa uni depanteko adita somoirangna kragija doke sate, gisikni gita sinjetaniko on·aha.

Ua ong·a obosta re·anggipa February 12 tariko bi·sani skulo class work ka·ani somoio uko skigipa doka satani ja·mano, bi·sani ma·gipa pagipa, Skulni Principal-na aganataha. Uan maming dakeba annually, quarterly porikka ba unit test ong·jachim ine bi·sani pagipa aganaha. Apsan daken Budbar saloba skigipani mingsa formula-ko sing·anina aganchakna man·jani giminba ua bi·sako bilchi sason ka·aha.

Indita bilsirangna ua skigipa, bang·a chatro chatrirangkon, indake bilchi sason ka·ani a·sel bi·sarangni gisiko chanchianirangko nosto ka·an baksa sinjetaniko on·aha. Ua skigipa bi·sarangko pangnan class jinmao kratcha·ate, chonike, chu·sokgijani kattarangko agane chatro chatrirangko chonnikongachim.

Ru·uta somoirangna Biswanath Patro-ni indakgipa kamrangko nie dongna man·jae, uni kosako kakket bichalko on·na nangchongmota ine bi·sani ma·gipa pagipa dabiangaha.

Indake gisiko sinjetaniko man·e, ua bi·sa gisikni gita namen neng·nikaniko chagrongaha. Uni poraianiko nosto ka·an baksana skulchi re·na jechakaniko man·aha ine bi·sani pagipa u·iataha.

Biswanath Patro-ni indakgipa bewalko jakkalaniara saksa skigipa ong·e, chatro chatrirangna daitoko ra·e kam ka·aniko namen pe·ani ong·a ine Marak parakataha.