Tura, Sept 7,2024: West Garo Hills a·jani Selsella Block-ni ning·o donggipa Holdibari-oni Rochonpara-ona dakanggipa PWD ramako matchotgija galchipe donenggipa ramako ta·rake taripilchina Selsella jolni dingtang dingtang NGO-rang jekai ASWA, FKJGP aro GSU a·dok sorkario dabiangaha.
Ia ramani bidingo a·dokni dakchakgipa Skotong Minister aro PWD road-ni Minister Preston Tynsong-na lekka sedoatenba, “Ia ramako PWD jako ra·ahachim, indiba ia ramako PWD ru·uta bilsirangna taridapgija galchipe donaha. Ia ramao donggipa culvert aro dollongkoba taria matchotgija ru·uta bilsirangna galchipe donaha. Ia jolo rama namjani a·selan, songni manderang, mongsongbate skul poraigipa chatro chatrirang salanti re·a doanio namen neng·nikaniko man·tokenga” ine NGO-rang parakataha.
Indiba ia ramako matchote tarigenchimode, manderangni janggi tanganiko dingtangatna man·genchim, ineba NGO-rang parakataha.
Uni gimin ia galchipe donenggipa PWD ramako ta·rake taripilchina dolgittam NGO-rang PWD Minister-ko didiataha.
