Tura, Dec 8, 2025: West Garo Hills a·jani Jengjal, Bolbokgre-Wa·tregre songo salgnina ong·atanggipa Me·gong Festival, Sonibar walo, matchotangaha.

Ia bon·kamgipa attamo, Bollywood-ni git ring·gipa Kanika Kapoor, Prateek Kuhad, a·gilsak gimiko mingsinggipa, Blue dol aro bon·kame Yellow Claw, gitrangko ring·e, manderangko an·saoatangbeaha.

Ia apsan attamon Garo Hills-oni mingsinggipa dolrang, jekai Hoi Hoi Makbil, G-Hills Finest, Crack Gang, Rough Road aro Nokpante dolrang, Kingfisher Stage-o gitrangko ring·e manderangko an·saoatangskaha.

Me·gong Festival-ko a·bachengatani Sukrobar attamoba, dingtang dingtang biaprangoni mingsinggipa singer-rang aro music band-rang, jekai Richard Marx, Neeti Mohan, Julian Marley aro Nucleya dolrang, Aski Stage-o gitrangko ring·e manderangko an·saoatangaha aro joltangni dingtang dingtang git ring·gipa dolrang, jekai Ahaia aro Haystack Ladies dolrang git ring·an baksana CM-MGMP Beat Contest-ko ong·atanichi festival-ona re·bagipa manderangko an·saoatangbeaha.

Indake salgnina ong·atanggipa Me·gong Festival, 2025-o A·chikrangni bijakrangko song·susaani ‘Great Garo Hills Cook Off’ program baksa Miss & Mister Me·gong-na susaaniko ong·atangaha. Uandake salgnina ong·atanggipa Me·gong Festival-o sak 50,000-na baten manderang re·bae bakko ra·angtokaha. Skanggipa salo festival-ona re·bagipa manderang komioba, bon·kamgipa salo manderang namen bang·bataha.

Ia Me·gong Festival-o a·dokni Skotong Minister Conrad K Sangma, dingtang dingtang Cabinet Minister-rang, MLA-rang, MDC-rang aro dingtang dingtang dilgiparangba bak ra·angtokaha.

Indake ong·engon, ia Me·gong Festival-o gitrangko ring·na okamatako man·gipa a·doktangni aro joltangni git ring·giparang aro dingtang dingtang dolrang, ia bilsini Me·gong Festival-ko Organize ka·gipa ba ong·atgipa manderangni kamrangna suk ong·gijaniko parakattokaha.

Indake festival-ni gnigipa attamo, Aski Stage-o git ring·aniko a·bachengani namen ja·manchakaha aro ia program-o git ring·na okama man·gipa dolrangna git minggnisan ring·na cholko on·aiaha.
“Chingna ia festival-o git ring·na a·bachengode, minute 30 somoiko tik ka·ahachim, indiba bon·kamao chingko git minggnikosan ring·china aganaiaha. Unbaksana chingna ia festival-o car pass-koba on·jani a·sel chinga kilometre gni ramako bostu chile ja·achi re·na nangaha. Beben chingni sokangchengode, volunteer-rang, chingni bosturangko de·na dakchakaha, indiba re·pilani somoiode chingna dakchakgiparang dongjani a·sel, indita chel·gipa ramako an·tangtangsa bostu chile re·bapilna nangaha,” ine festival-o git ring·gipa dol suk ong·gijaniko parakataha.