Tura, Feb 10,2025:A·chik Baptist Dal·gipa Krima (ABDK) bilsi 150-ni Sesquicentenial Jubilee Culmination-ko maniani February 9 tarik Robibar attamo matchotangaha. Ia tom·bimonganio dingtang dingtang Krima ba Mondolirangni dilgiparang re·bae bak ra·angaha.

ABDK Soba, ian A·chik Kristian bebe ra·giparangni dal·begipa maniani ba tom·bimongani ong·a aro ia tom·bimonganiko February 6 tarikoni 9 tarikona, West Garo Hills a·jani Babadam Balupara-o donggipa ABDK-ni permanent biap “Bethel A·bri”-o ong·atangaha. Ia ABDK bilsi 150-ni Jubilee Culmination Program-na donsogimin Them-ara, the “Great Things He Has Done” ingipa Sastro-ni Katta Bichongko done, tom·bimonganiko ong·atangaha. Ia ABDK Sobako Bristibar attamoni a·bachenge, Robibar attamona, dingtang dingtang Krimarangni dilgiparang, Isolni songnok a·bana dangdike on·giparang, Isolni nama kattarangko skiprakangaha.

Ia tom·bimongani bon·kamgipa Robibar salo A·chik a·songni dingtang dingtang biaprangoni bebe ra·giparang re·bae bak ra·angtokaha. Indake Robibar salni tom·bimonganio South Asia Institute of Advanced Christian Studies (SAIACS) Bengalore-ni Principal Rev. Dr. Brabhu Singh Isolni nama kattarangko aganprakangaha aro uni English-chi aganpakaniko, Rev. Dr. Alpha Sengba Marak A·chik ku·chi pe·e on·angskaha.

Ia dal·begipa ABDK Jubilee Culmination Program-ko ong·atna gita A·chik a·songo donggipa dingtang dingtang Mondolini dilgiparang rakbee kam ka·anichi chu·sokatna man·ahani gimin, ABDK-ni Padot Sundarsingh A Sangma Nokgipa Isolko mittelan baksa dangdike on·gipa aro dakchakgipa Krima ge·antiko aro sakanti Mondolini dilgiparangko mittelpilangskaha.