Himachal Pradesh, June 23, 2025: Himachal Pradesh a·dokni Sirmaur a·jao donggipa sorkari skulo poraienggipa sak 24 me·chik chatrirangko kragija kal·ake roanina skigipa saksako pulis rim·aha ine Sombar salo pulis officer aganaha.

Koborni gitade, class VIII aro Class X-o poraienggipa me·chik chatrirang, skigipa saksani an·tangtangko kragija dangtapenba kal·ake roengani gimin Skul Principal-na Sukrobar salo lekka seachi badi ka·ahanina, skulni authority-rang pulisna u·iataha aro ua skigipako pulis rim·aha.

Sirmaur a·jani Rajgarh Government Model Senior Secondary Skulni Mathematics skigipa sak 24 me·chik bi·sarangko kragija dangtape kal·akrongachim. Indaken, obostako vhagronggipa me·chik chatrirang an·tangtangko kragija dangtape kal·akahani gimin, skulni Principal, Kanta Devi-na lekka seachi badi ka·doangaha. Principal badi ka·gipa chittiko Skulni Anti-Sexual Harassment Committee-na watdoataha ine skul authority-rang NET-na aganaha.

Iani bidingo me·chik chatrirangni ma·gipa pagiparang Sonibar salo tom·aniko ong·ataha aro uamangni dedrang iandakgipa obostako chagronggen, ine darangba chanchijachim. Duko ga·akgipa me·chikrang an·tangtangna ong·a obostako skigipana kene ma·gipa pagiparangna agana pa·jahachim.

Ua skigipako ta·rake skuloniko ra·galchina didiatenba, me·chik chatrirangna mikkangchi indakgipa obostarang ong·taijana gita me·chik chatrirangni ma·gipa pagiparang dabiangaha. Ua obostani bidingo kobor on·gija donchipna jotton ka·aha aro somoi gita u·iatjaha ine sak 24 me·chik chatrirangni ma·gipa pagiparang skul management-ko matnangaha.

Uandake ong·engon, Skul Principal, ua obostani bidingo talatenggon, skigipa basako ia me·chikrangko kragija kal·ake roahachim, skul management-ba mamingkon ma·sijaha. “Iana skang darangba skigipani kosako badi ka·a dongja. Indiba jensalo me·chik bi·sarang badi ka·aha, chinga ta·raken jako ra·e kam ka·aha” ine Principal aganaha.

Rim·a man·gipa skigipani kosako Bharatiya Nyaya Sanhita-ni Section 75 (sexual harassment)-ni ning·o aro Protection of Children from Sexual Offences (POCSO) Act-ni dongimin niamo pangchake mamlako segataha, ine pulis officer u·iataha.