Mendipathar, April 24,2025:North Garo Hills a·jani Mendipathar-o kuligipa PEPSICO karkanao, kamna dorgasto galgiparangko joltangni MLA aro National People’s Party (NPP)-ni Recommend ka·atenggipa candidate-rangkosa kamo rakkienga ine joltangni bang·a candidate-rangni badi ka·anirangko man·soahani gimin Budbar salo, Rongrong-ni TMC MDC Rinaldo K Sangma aro Meghalaya Pradesh Youth Congress (MPYC)-ni President Timjim K. Momin,PEPSICO karkanani Human Resources Recruitment (HR)-ni Menager-ko gronge iani bidingo chanchirimaniko dakangaha.

Mendipathar PEPSICO karkanao kamna rakkianio NPP MLA-rangni see on·atgipa candidate-rangkosa kamo rakkienga ine joltangni chadamberang badi ka·aniko man·soani ja·man, Rongrong-ni MDC aro MPYC-ni President sing·sandianiko dakon, NPP MLA-rangni didianiko man·e, uamangni see on·atgipa ba recommend ka·atenggipa candidate-rangkosa kamo rakkina nangenga ine ku·chakatenba, mikkangchi indake politician-rangni didianiko ra·gija, niam gita candidate-rangko kamo ra·gnok ine PEPSICO karkana-ni HR ku·rachakataha.

“Ia karkanani dingtang dingtang kamrangna NPP MLA-rangni recommend ka·atenggipa candidate-rangko aro NPP-ni manderangkosan kamo ra·enga ine Mendipathar aro Resubelpara-ni chadamberangni badi ka·anirangko man·soe, anga da·alo, MPYC-ni President Timjim Momin baksa PEPSICO karkanaona re·ange sing·sandianiko dakangaha” ine Rongrong-ni MDC Rinaldo Sangma parakataha.

Sangma-ni parakatani gitade, uamang Mendipathar PEPSICO karkanaona re·ange HR-ni Manager-ko sing·sandion, local MLA-ni didianiko man·e, ia karkanao uamangni recommend ka·atenggipa candidate-rangkosa kamo rakkina nangenga, indiba mikkangchide indake darangkoba mikkang niteani gri kamrangko on·gnok ine HR-ni Manager, ku·rachakataha.

Da·ode ia karkanao kamna rakkiengon, North Garo Hills a·jani manderangnasa skanggipa cholko on·china MDC aro MPYC President dabiangenba mikkangchi indake politics-ni gita darangnaba kamrangko on·jachina mikrakataniko on·angaha. “Ia niamko ja·rikjagenchimode, chinga uamangni kosako rakgipa ja·kurangko de·gen” ine Sangma mikkrakatangaha.

Uandake, PEPSICO karkanani Official-rangba ia karkanao kam ka·na gisiko nanggipa aro mongsongbate joltangni manderangna dorgasto galchina cholko on·gnok ine Rongrong MDC-na parakataha.