Resubelpara, Oct 11, 2024: Rongrong-ni MDC, Rinaldo K.Sangma, North Garo Hills a·jao District Selection Committee (DSC)-ni gita LDA-Cum-Typist aro gipin kamrangna seokanio maming donnuani gri parake aro darangkoba mikkang niteani gri dakchina, North Garo Hills a·jani Deputy Commissioner-ko didiataha.

Rinaldo Sangma-ni Deputy Commissioner-na seatgipa chittio janapatani gitade, North Garo Hills a·jao MLA-ni depante, DSC-ni Vice Chairman ong·engani gimin, bang·a manderangan kenchaktokenga, uni gimin dingtang dingtang kamrangna seokanio maming dongnuani gri jinmani namnika gita dakna nanga.

DSC-ni Vice Chairman MLA-ni depante ong·ani gimin pilak kamrangon ong·gija dakaigen inede ong·ja, indiba dilgipani manderang DSC-ni member ong·engon, mikkang niteani ba baseteani dongaia aro ian Prevention of Corruption Act-ni ning·o dongimin niamrangko pe·ani gita ong·a, ineba Rongrong-ni MDC parakataha.

Indakgipa obostarang ong·engon, porikkarango chu·sokgipa ong·genchimoba, dal·dalgipa manderang baksa bak dongpagijagipa candidate-rangde pangnan sorkarini kamrangko man·rongja. A·jao DSC-ni gita bang·a dingtang dingtang kamrangna manderangko seokanio maming dongnuani gri jinmana parake dakchina Rongrong-ni MDC, North Garo Hills a·jani Deputy Commissioner-ko didiataha.